Թուրքիայի ԱԳՆ նախարար Հաքան Ֆիդանը Ստամբուլում «3+3» տարածաշրջանային հարթակի հանդիպմանը, որին, ինչպես ակնկալվում է, կմասնակցեն Հայաստանի և Ռուսաստանի արտգործնախարարներ Արարատ Միրզոյանն ու Սերգեյ Լավրովը, կընդգծի Անկարայի աջակցությունը Բաքվի և Երևանի միջև խաղաղության պայմանագրի կնքման գործընթացին։ Այս մասին հայտնում է «ՌԻԱ Նովոստի»-ն՝ հղում անելով Թուրքիայի մայրաքաղաքում դիվանագիտական աղբյուրին։
«Ակնկալվում է, որ նախարար Ֆիդանը իր ելույթում կհայտարարի, որ Անկարայի ջանքերն ուղղված են Կովկասում խաղաղության և կայունության հաստատմանը: Ակնկալվում է, որ շեշտը կդրվի այն բանի վրա, որ տարածաշրջանային պատասխանատվությունը խնդիրների լուծման ամենաարդյունավետ մեթոդն է: Նախարարը կընդգծի, որ Թուրքիան աջակցում է մի գործընթացի, որին զուգահեռ ընթանում է Թուրքիայի և Հայաստանի միջև հարաբերությունների կարգավորման գործընթացը»,- ասել է գործակալության զրուցակիցը։
Դիվանագիտական աղբյուրի խոսքով՝ հանդիպման մասնակիցները համատեղ հայտարարություն կընդունեն՝ ընդգծելով հակամարտությունների խաղաղ կարգավորման անհրաժեշտությունը։
«Հանդիպման ավարտին մասնակից երկրները նախատեսում են ընդունել համատեղ հայտարարություն: Հայտարարության տեքստում կընդգծվի տարածաշրջանի երկրների միջև առկա խնդիրները երկխոսության միջոցով լուծելու անհրաժեշտությունը՝ ելնելով ՄԱԿ-ի կանոնադրության մեջ ամրագրված սկզբունքներից»,- ասել է գործակալության զրուցակիցը։
Նրա խոսքով՝ հայտարարության տեքստում նախատեսվում է նաև շեշտը դնել տարածաշրջանային տնտեսական համագործակցության, վստահության ամրապնդման և բարեկեցության բարձրացման անհրաժեշտության վրա: