Բոսնիա և Հերցեգովինայի հարավում հորդառատ անձրևներից առաջացած հեղեղումներից և սողանքներից առնվազն 14 մարդ է զոհվել։
Փրկարար ծառայության տվյալներով՝ մի քանի մարդ անհետ կորած է։
Վնասվել են ճանապարհներն ու երկաթուղիները, անջատվել է բջջային կապը, թեև ֆիքսված հեռախոսները դեռ աշխատում են։ Յաբլանիցա և Կիսելյակ քաղաքների բնակիչները մնացել են առանց էլեկտրականության։
Սարաևոն Ադրիատիկ ծովի ափին կապող Յաբլանիցա քաղաքով անցնող գլխավոր ճանապարհներն ավերվել են սողանքների պատճառով։ Ջրի հոսքը քշել-տարել է մեքենաներն ու ընտանի կենդանիներին։
Իշխանությունները կոչ են արել բնակիչներին տեղափոխվել շենքերի վերին հարկեր՝ ջրհեղեղներից խուսափելու համար:Անձրևներ և ուժեղ քամիներ են նաև հարևան Խորվաթիայում և Չեռնոգորիայում։ Զագրեբում գետը դուրս է եկել ափերից, մի քանի ճանապարհներ փակվել են, մի քանի գյուղ կտրվել է արտաքին աշխարհից։