«Նորագյուղ թաղամասը, ենթադրվում է, որ դառնալու է Երևանի նոր կենտրոնը»:
Այս մասին Երևանի քաղաքապետարանի գործակարգավարական խորհրդակցության ժամանակ ասաց քաղաքապետ Տիգրան Ավինյանը՝ ներկայացնելով Նորագյուղի ծրագիրը, որը դիտարկվում է որպես «Երևանի ուրբան զարգացման դրոշակակիր ծրագիր»:
Այս համատեքստում քաղաքապետը կարևորեց Նորագյուղի բնակիչների իրավունքների լիարժեք պաշտպանությունն այս ամբողջ գործընթացում:
«Շատ դեպքերում այնտեղ տները բավականին հին են, հողաշեն տներ կան, և բնակիչները կարիք ունեն բնակարանային ու բնակֆոնդի հարցերի լուծման: Այս ծրագիրն օգտագործելով՝ վստահ եմ` ամբողջ Նորագյուղ թաղամասի խնդիրները հնարավորություն կունենանք լուծելու»,- ասաց նա:
Մյուս խնդիրը ըստ քաղաքապետի ճանապարհի խնդիրն է:
«Այս ծրագրով կապահովվի Մոնթե Մելքոնյանի միացումն Արշակունյաց պողոտայի հետ, այսինքն՝ Իսակովի-Արշակունյաց պողոտաների միացումը, որն էականորեն բեռնաթափելու է այդ հատվածի երթևեկության ծավալը: Ամենակարևորը՝ ուրբանիստական այս լուծումները բեռնաթափելու են նաև Երևանի Փոքր կենտրոնը, քանի որ ենթադրվում է, որ նոր թաղամաս են տեղափոխվելու բիզնեսներ, ՏԻՄ սուբյեկտներ»,- ասավ Ավինյնաը:
Քաղաքապետը նկատեց՝ քանի որ ծրագիրը ծավալուն է, և մեծ ռեսուրսներ են հարկավոր, ծրագրի իրականացման համար անհրաժեշտ կլինի կառուցապատման և շինարարական ոլորտների մասնակցությունը. «Մեզ հարկավոր է լինելու փնտրել և գտնել միջազգային գործընկերներ, միջազգային դեվելոփերական ընկերություններ, որոնք նմանատիպ ծավալի իրականացման փորձ ունեն, և նախնական որոշակի քննարկումներ կան»:
Ավինյանը գոհացուցիչ է համարում այն, որ գլխավոր հատակագիծն արդեն կա, որն իրականացվել է ֆրանսիացի հայտնի ճարտարապետական ընկերության կողմից.
«Նաև կարևոր է, որ գլխավոր հատակագծից որևէ տեսակի շեղում մենք թույլ չտանք, այսինքն՝ ի սկզբանե ինչպես նախագծվել է, ամբողջական տրամաբանությունը կարողանանք պահպանել»: