Այս պահին Երևանի ընդհանուր իրավասության դատարանում ընթացող Մարտի 1-ի գործով մեղադրյալ Ռոբերտ Քոչարյանի խափանման միջոցի քննությանը ներկա է նաև մարտի 1-ի զոհերից Գոռ Քլոյանի հայրը՝ Սարգիս Քլոյանը։
Սարգիս Քլոյանն ասաց, որ այս փուլում նա կհետևի դատական նիստին, իսկ արդեն բուն դատավարության ընթացքում հանդես կգա որպես կողմ։
Նշենք, որ Քլոյանը Մարտի 1-ի գործով տուժողի իրավահաջորդ է։
Անդրադառնալով երեկ դատարանում կատարվածին, երբ բռնություն էր կիրառվել ակտիվիստ Վարդգես Գասպարիի նկատմամբ, այն որակեց «խուժանություն»։
«Ես ունեմ տեղեկություններ, որ Քոչարյանի կողմնակիցները այստեղ են գալիս փողի դիմաց», — հավելեց Քլոյանը։
Նշենք, որ այս պահին դատարանը փոքր ընդմիջում է հայտարարել, քանի որ Քոչարյանի պաշտպանական խումբը ցանկացավ ծանոթանալ իրենց միջնորդությունը մերժելու մասին դատարանի որոշմանը։
տեսանյութը` factor.am
