Հայաստանն ու Ադրբեջանը հաստատել են իրենց մասնակցությունը Ղազախստանում նախատեսվող բանակցություններին, դրանց անցկացման ժամկետը կհայտարարվի ավելի ուշ:
Այս մասին հայտնել է Ղազախստանի արտաքին գործերի նախարարության պաշտոնական ներկայացուցիչ Այբեկ Սմեդյարովը։
«Ալմաթիում կկայանան Ադրբեջանի և Հայաստանի արտգործնախարարների բանակցությունները, երկու կողմն էլ հաստատել են իրենց մասնակցությունը։ Միջոցառման օրը լրացուցիչ կհայտարարվի»,- շեշտել է Սմեդյարովը։
Ղազախստանի փոխարտգործնախարար Ալիբեկ Բակաևը ավելի վաղ РИА Новости-ին ասել էր, որ հանդիպման ամսաթիվը որոշված չէ, քանի որ Հայաստանը դեռ չի հաստատել իր մասնակցությունը:
Ղազախստանում երկու երկրների միջև բանակցություններ վարելու գաղափարը Հայաստան և Ադրբեջան կատարած վերջին այցերի ընթացքում առաջարկել է հանրապետության նախագահ Կասիմ-Ժոմարտ Տոկաևը։
«Հայկական ժամանակ»-ի հետ զրույցում ՀՀ ԱԳՆ մամուլի քարտուղար Անի Բադալյանը ապրիլի 29–ին հաստատել էր, որ կա Հայաստանի և Ադրբեջանի նախարարների հանդիպման պայմանավորվածություն՝ ղազախական կողմի առաջարկով. հստակեցված է, որ այն կանցնի Ալմաթիում։
2 երկրի ԱԳ նախարարների՝ Ղազախստանում հանդիպման մասին տեղեկությունն ավելի վաղ ԱՄՆ պետքարտուղար Էնթոնի Բլինքենի հետ հեռախոսազրույցի ժամանակ, հայտնել էր նաև Ադրբեջանի նախագահ Իլհամ Ալիևը:
Մինչ այդ էլ՝ ապրիլի 26-ին, Հայաստանի արտաքին գործերի նախարարությունը հայտնել էր, որ ղազախական կողմի առաջարկով Հայաստանի ու Ադրբեջանի արտաքին գործերի նախարարների հնարավոր հանդիպման ամսաթվի մասին կտեղեկացնի դրա շուրջ պայմանավորվածություն ձեռք բերվելուն պես։
