«Քրիստոնեա-Ժողովրդավարական» կուսակցության փոխնախագահ Հայկ Սուքիասյանի խոսքով՝ ընդդիմության և այս օրերին բողոքի ակցիա իրականացնողների մեծ մասի օրակարգը Հայաստանի Հանրապետության պետականության փլուզումն է:
«Այդ մարդիկ ձևականորեն գոռում են ազատություն, բայց գովերգում են ճորտությունը, նաև ունեն ֆունկցիա իրենց հայրենիքի նախագահից՝ Վլադիմիր Վլադիմիրովիչ Պուտինից, ցնցել Հայաստանը, հանձնել ՀՀ-ն նրանց»,- «Հայկական ժամանակ»-ի հետ զրույցում ասում է նա:
Ըստ զրուցակցի՝ վերջիններս արդեն 5 տարի է՝ փողոց նետվելով տարբեր լոզունգներով, պատրվակներով՝ փորձում են դրան հասնել, սակայն չեն հաջողում. «Հիմա էլ իրենց ընդհանուր հնչեղությանը միացել են եկեղեցու պետերը, որպեսզի օրհնեն Հայաստանի փլուզումը, բայց այդ մարդկանց հետ ժողովուրդ չկա, իրենք մեր ժողովրդի հետ կապ չունեն, մեր ժողովրդից չեն. էթնիկական հատկանիշներով հայ են, ազգանունն է հայի, տատն է հայ, բայց ազգային ինքնագիտակցությամբ ռուս են: Իրենք զարմանում են, թե էդ ոնց է լինում, որ ամեն ինչ անում են, բայց էս ժողովուրդը չի միանում, բա էս ժողովուրդը օտարին ինչո՞ւ պիտի միանա»:
Հայկ Սուքիասյանը ՀՀ իշխանություններին, մասնավորապես՝ Ազգային անվտանգության ծառայությանն առաջարկում է ճշտել, թե ովքե՞ր են և ինչո՞վ են զբաղվում այդ ակցիաներին միացած հոգևորականները:
«Գիտենք՝ իրենք ովքեր են, ՌԴ-ից՝ Կիրիլից նամակներ են ստանում, թե ինչպես ցնցել Հայաստանը, որովհետև մեր կաթողիկոսը Կիրիլի տեղակալն է, սրբազաններն էլ՝ Կիրիլի տեղակալի տեղակալները, պիտի այնտեղից ինֆորմացիան գա: «Սխոդկա» է հոգևորականների, հավանաբար մյուռոնն էլ դրած է սեղանին, մի հատ էլ կխմեն Հայաստանի «ազատության» համար: Եթե սա Գերմանիայում լիներ, վաղուց նրանց հավաքել լցրել էին կոնսլագեր: Հո չէի՞ն թողնելու, որ պետությունը ցնցեին»,- ասում է նա:
«Քրիստոնեա-Ժողովրդավարական» կուսակցության փոխնախագահն ասում է՝ եկեղեցին բազմաթիվ գործառույթներ ունի, որից մեկը ժողովրդի բարոյական, հոգևոր կյանքը քննելն է, ոչ թե քաղաքականությամբ զբաղվելը:
«Պարզ է, թե այս մարդիկ ովքեր են, նաև պարզ է, որ ռուսական հատուկ ծառայությունները մեր եկեղեցին օկուպացրել են: Ես պահանջ ունեմ իշխանություններից՝ մեր եկեղեցին պիտի վերադառնա դեպի մեր ժողովուրդը, իրենք իրենց кгб-շնիկությամբ կտրում են մեր ժողովրդի և եկեղեցու կապը, ժողովուրդը պիտի մտնի եկեղեցի, Աստվածաշունչ լսի, մեր հոգևորականները դա պիտի անեն, բայց իրենք էս ամեն ինչը թողել են՝ «դե էսի կարևոր գործ չի, գնում ենք Ոսկեպարով Կասպից ծովը փրկենք», որ երևի հետո էնտեղից Դաղստանով ուղարկեն ՌԴ իրենց»,- տեսակետ է հայտնում նա:
Ըստ նրա՝ ակցիաները միաժամանակ առաջացնում են հազարավոր քաղաքացիների զայրույթը, քանի որ նրանց ազատ տեղաշարժի իրավունքն է խախտվում. «Մեր ժողովրդի հավաքական մեծամասնությունը ուզում է պետություն, հիմա կա մի հատված, որը դեմ է դրան, որը թշնամի է ՀՀ օրինական քաղաքացուն: Մարդիկ ուզում են հանգիստ գնալ իրենց գործերին, այսինքն՝ այս մարդիկ մարդկանց առօրյա կյանքն էլ են փչացնում: Սա հայության կյանքում դարավոր հոգեկան հիվանդ հատվածն է, որը մեզ հետ կապ չունի, դրա համար պետք է, որ պետությունն ինքն իրեն հարգի, պիտի առանձին դեպքերում չվախենա օրինական ուժ կիրառել: Էս ոստիկաններին տարել, սովորական ամառային հագուստով կանգնեցրել են կերած, խմած, պարապած ցուցարարների առաջ, հա՞. եթե պետք է, պետությունը պետք է օրինական ուժ կիրառի»,- ասում է Սուքիասյանը:
Վերջինիս խոսքով՝ թեև պարզ է, որ փողոցում, այսպես ասած, պայքարողները թույլ են, քիչ են, բայց պետք է լինեն վերահսկողության տակ. «Վերջին շունչն է, վերջին շանսն է, հավաքել են ամբողջ պոտենցիալը, որպեսզի ՀՀ ազատությունը թույլ չտան, քանի որ տեսնում են, որ Հայաստանը հասել է դելիմիտացիայի գործընթացին, արդեն պոկվելու վրա ենք այդ 200 տարվա ռուս-թուրքական մահաբեր գործարքից: Էս վերջին շանսն է, հասկացել են, որ ՀՀ-ն պոկվում է՝ ոտքով, ձեռքով, տնեցիքով, հոգևորականով, թաշախուստով, նախկին՝ չգիտես ինչով կախվել են էս պետության ոտքից, որպեսզի ազատություն թույլ չտան: չպիտի պետությունը թուլացնի զգոնությունը»:
