«Հանուն Հանրապետության» կուսակցության փոխնախագահ Ռուբեն Մեհրաբյանը կարծում է, որ Մոսկվայի պաշտոնական ներկայացուցիչների քննադատական հայտարարությունները, որը տպավորություն են ստեղծում, թե հասցեագրված են Հայաստանի իշխանությանը, իրականում ուղղված են Հայաստանին և նրա ցանկացած քաղաքացուն, նույնիսկ նրանց, ովքեր չեն քվեարկել «Քաղաքացիական պայմանագիր» կուսակցության օգտին:
«Այս ամենը միանգամայն այն ոճի շրջանակում է, որը որդեգրել է ռուսական շիզոֆաշիզմը»,- «Հայկական ժամանակ»-ի հետ զրույցում ասում է նա՝ հավելելով, որ սա Հայաստանից պահանջում է շատ կոնկրետ պատասխան, գործնական քայլեր:
«Շատ պարզ հարց է առաջանում՝ նրանց դեսպանն այսքանից հետո ի՞նչ գործ ունի այստեղ, 10 հարկանի դեսպանությունն ինչո՞ւ են պահում մի երկրում, որը թշնամական է իրենց նկատմամբ: Դեսպանին, որը համակարգում է ռուսական քաղաքականությունը մեզ մոտ, պետք է 24 ժամ տրվի, և նա լքի Հայաստանի տարածքը: Ռուսական ուժային գերատեսչությունների ներկայացուցիչները ևս պետք է արտաքսվեն Հայաստանից, որովհետև այդ հռետորաբանությունն այլևս աններելի է: Սրանք սոլավյովներ չեն, որ ալիքը փակենք, ասենք՝ թող ինչ ուզում է, խոսի, մեզ մոտ չի հեռարձակվում: Սրանք պաշտոնյաներ են, և սա ոչ թե Լավրովը կամ Զախարովան են ասում՝ սթափ կամ ոչ սթափ վիճակում, այլ՝ Պուտինը, պարզապես՝ նրանց շուրթերով: Սա ուղղակի սպառնալիք է ՀՀ-ի համար և պահանջում է պատասխան գործնական քայլեր»,- կարծում է զրուցակիցը:
Մեկնաբանելով Զախարովայի այն հայտարարությունը, թե Ռուսաստանը Հայաստանից հստակ արձագանք է ակնկալում ԱՄՆ-ի և Եվրամիության հետ «ռազմաքաղաքական պայմանավորվածությունների» մասին տեղեկությունների մասով՝ Մեհրաբյանն ասում է՝ Հայաստանը պարտական չէ Ռուսաստանին բացատրություններ տալ. «Հայաստանը, այո, ռազմաքաղաքական համագործակցություն է ուրվագծում ԵՄ-ի, առանձին երկրների, ԱՄՆ-ի հետ, որովհետև վերջին 200 տարվա ընթացքում գործ է ունեցել մի սուբյեկտի հետ, որը ՀՀ-ն դիտարկել է որպես գրպանի մանրադրամ՝ փոխանակելու համար: Հայաստանն այսօր հարաբերություններ է հաստատում այն սուբյեկտների հետ, որոնց հետ ունի ընդհանրություններ թե՛ շահերի, թե՛ նպատակների, թե՛ արժեքների տեսանկյունից»,- նկատում է քաղաքագետը:
Մեհրաբյանի դիտարկմամբ՝ այս ամենը նաև հարցեր է առաջացնում, թե Հայաստանը Ռուսաստանի ստեղծած պատանդառու կազմակերպությունների մեջ անդամակցությունն ինչո՞ւ է շարունակում. «Վայրահաչում են Հայաստանի ուղղությամբ, որովհետև ՀՀ-ն որդեգրել է մի քաղաքականություն, որը ռուսական շահերի առաջխաղացմանն այլևս չի նպաստում. ռուսական շահերին նպաստելը կնշանակի նպաստել հայկական պետականության ոչնչացմանը»:
Մեկնաբանելով Պետդումայի պաշտպանության կոմիտեի նախագահի առաջին տեղակալ Ալեքսեյ Ժուրավլյովի այն հայտարարությունը, թե ռուսական խաղաղապահ կոնտինգենտի առաքելությանը Լեռնային Ղարաբաղում հաջողվել է փրկել քաղաքացիական բնակչությանը տարհանման ժամանակ՝ Մեհրաբյանն ասում է՝ սա ուղղակի ցինիզմ է:
«Ռուսական զորքերի առաքելությունը, որ ավարտված է այնտեղ, դժվար է չհամաձայնել, ավելին՝ ռուսական ներկայության առաքելությունն է պատմականորեն ավարտված, և, այո, վերջակետերը դնելու ժամանակն է: Այժմ ՀՀ-ն ևս պետք է իր քայլերն անի, որովհետև ռուսական ներկայությունը Հայաստանում վերածվելու է ամենօրյա սպառնալիքի: Մենք հիմա նստած ենք ռումբի վրա, վրան գրված՝ «сделано в России», և այդ ռումբերի պայթեցման վահանակը ռուսների ձեռքում է»,- կարծում է զրուցակիցը:
Նրա խոսքով՝ այս իրավիճակում Հայաստանի համար ամենառիսկայինը ոչինչ չփոխելն է, որը նշանակում է դանդաղ, կամ ոչ այնքան դանդաղ մահ. «Սա պայքար է. ռուսներն ուզում են մեր պետությունը լիկվիդացնել, մենք որպեսզի դա թույլ չտանք, պետք է լիկվիդացնենք ռուսական ներկայությունը ՀՀ-ում և չեզոքացնենք ռուսական սպառնալիքը ընդդեմ Հայաստանի»:
