Ռուսաստանն այսօր հայտարարում է՝ մենք չենք պատրաստվում այս տարածաշրջանից հեռանալ, բայց ես գիտեմ, որ Ռուսաստանը նաև ասել է, որ Հայաստանի ինքնիշխան տարածքը և ՀՀ սահմանները իրենց համար կարմիր գիծ են, բայց դա գործնականում չի իրացվել, այդ դեպքում ո՞վ է ասել, որ առաջին հայտարարությունն իրացվելու է: Այս մասին այսօր՝ մարտի 12-ին, մամուլի ասուլիսի ժամանակ նշեց ՀՀ վարչապետ Նիկոլ Փաշինյանը:
«Հարաբերությունների ռեպուտացիան ամենակարևոր բանն է: Հայ ժողովուրդն իր դաժան պատմության ընթացքում մի անգամ առերեսվել է այդ իրավիճակի հետ դարասկզբին՝ ինչ են եղել դրա հետևանքները, բոլորս գիտենք: Կարմիր գծի հետ կապված իրադրությունը մեզ համար կարմիր տագնապի լույս է, որ այստեղ ինչ-որ մի բան էն չի:
Ես գնացել եմ այդ հարցի հետևից, փորձել ենք հասկանալ՝ լավ, ես ե՞մ պրոբլեմը, ի՞նչն ենք սխալ անում: Հարցի պատասխանը դա է, որ եթե մի հայտարարություն այդ մակարդակով կարող է մնալ անհետևանք, ուրեմն ցանկացած հայտարարություն կարող է մնալ անհետևանք: Եթե մի հայտարարություն կարող է իրականության մեջ դրսևորվել ուղիղ հակառակ իմաստով այդ ֆորմատով, ուրեմն այդ ֆորմատով ասվածը կարող է նույնպես հակառակ իմաստով դրսևորվել»,-ասաց Փաշինյանը: