Մյունխենում վախճանվել է ֆուտբոլի աշխարհի 1990 թվականի չեմպիոն, Գերմանիայի հավաքականի նախկին կիսապաշտպան Անդրեաս Բրեմեն, գրում է գերմանական Bild պարբերականը:
Աղբյուրի տեղեկացմամբ՝ մահը վրա է հասել սրտի հետ կապված խնդրի հետևանքով: 64 տարեկան վետերան մարզիկին արագ տեղափոխել են հիվանդանոց, սակայն բժիշկներին չի հաջողվել վերականգնել սրտի աշխատանքը:
1990 թվականի աշխարհի առաջնության եզրափակիչ խաղում հենց Անդրեաս Բրեմեի խփած գոլն էր ապահովել Գերմանիայի ընտրանու հաղթանակը: 85-րդ րոպեին նա, իրացնելով Արգենտինայի հավաքականի դարպասին նշանակված 11-մետրանոցը, 1:0 հաշվով հաղթանակ էր պարգևել բունդեսթիմին, որն այդ հաջողության շնորհիվ հռչակվել էր աշխարհի եռակի չեմպիոն:
Գերմանիայի հավաքականի կազմում Անդրեաս Բրեմեն դարձել է նաև 1986 թվականի աշխարհի և 1992 թվականի՝ Եվրոպայի առաջնության արծաթե մեդալակիր, իսկ «Եվրո-88»-ում արժանացել է բրոնզե մեդալի:
Անդրեաս Բրեմեն հանդես է եկել նաև «Բավարիա»-ում, «Սաարբրյուկեն»-ում և «Սարագոսա»-ում:
Բրեմեն կարիերայի մեծ մասն անցկացրել է գերմանական «Կայզերսլաուտերն»-ում (154 խաղ, 34 գոլ) և իտալական «Ինտեր»-ում (155 խաղ, 12 գոլ):
