Երևանի քաղաքապետ Տիգրան Ավինյանը գործակարգավարական խորհրդակցության ժամանակ անդրադարձավ Օղակաձև զբոսայգու նորոգման ծրագրին, որի վերաբերյալ տարատեսակ քննարկումներ են եղել վերջին օրերին:
«Ներկայացված ծրագիրը թենիսի ակումբի քանդման ծրագիր չէ, Օղակաձև այգին Երևանի Փոքր կենտրոնի միակ երևելի կանաչ տարածքն է, հետևապես դրա փուլային վերականգնումը որպես կանաչ հանրային տարածք մեզ համար գերակայություն է և առաջնահերթություն: Բուն ծրագիրը առաջին հերթին վերաբերում է տարատեսակ ռեստորաններին, սրճարաններին և տաղավարներին, որոնք տեղակայված են և վերանալու են` տարածքը դարձնելով հանրային հասանելի կանաչ տարածք` նորարարական լուծումներով: Իսկ թենիսի կորտերի մասին կարող եմ ասել, որ ես ինքս դեռ 1996-ից մինչև 2002 թ. «Արարատ» ակումբում պարապել եմ, դա Երևանում իմ ամենասիրելի վայրերից մեկն է, բայց այստեղ հարցը ոչ թե մեր անձնական նախասիրությունների մասին է, այլ հանրային շահի»,- ասաց նա:
Ավինյանի խոսքով` թենիսի ակումբը պետք է վերակառուցվի և հասանելի լինի բոլոր անձանց, ովքեր պարապում են այնտեղ, բայց, վստահաբար, թենիսի ակումբի համար տեղակայման դիրքը այնքան էլ կարևոր չէ:
«Հաշվի առնելով, որ փոքր կենրտում Օղակաձև այգուց բացի կանաչ տարածքի այլ հնրավորություններ չկան, հետևապես լուծումներն այստեղ մեզ համար շատ պարզ են. «Արարատ» ակումբին անպայման տրամադրվելու է տարածք, այն շարունակելու է գործել, և մենք դա ապահովելու ենք, պետք է ապահովենք, որ այդ ծրագիրը արվի նախքան կորտերի տեղափոխումը, այսինքն` պետք է մեկ այլ հարմար տեղում ունենանք ակումբը, հետո նոր անցնենք քանդման աշխատանքներին»:
Իսկ ինչ վերաբերում է ընդհանուր կանաչ տարածքների վերականգնմանը, ըստ քաղաքապետի գաղտնիք չէ, որ բազմաթիվ այգիներում նմանատիպ աշխատանքներ իրականացվում են:
«Այս հատվածում էլ պետք է տարատեսակ շենք-շինություններ քանդվեն, որ տարածքը վերադարձվի երևանցիներին, պարզապես աղմուկը այստեղ շատ էր, բոլոր տեսակի պսևդոմասնագետներ սկսեցին անդրադառնալ այս հարցերին, անգամ հասան գնահատականի, որ սա կոռուպցիա է: Սա կարևոր սոցիալական ծրագիր է այն առումով, որ Երևան քաղաքում նման ծրագրերի շատ քիչ կհանդիպենք, երբ որոշակի բիզնես ընկերություն պատրաստ է մեծ գումարներ դնել հանրային տարածքներ վերականգնելու համար: Նման ծրագրեը միմիայն ողջունելի են և վստահաբար թենիսի կորտերի խնդիրը մենք կլուծենք: Իսկ բոլոր նրանց, ովքեր ճանճերի նման հավաքվել էին թենիսի թեմայի շուրջ, որ քաղաքական դիվիդենտներ շահեն, ասեմ` չի ստացվելու»,- ասաց Տիգրան Ավինյանը:
