Եթե քաղաքացին ունի վարձակալությամբ տրված անշարժ գույք և այն չի ստացել պետական գրանցում, ապա հարկային վարչարարությունից խուսափելու նպատակով պետք է ներկայացնել հայտարարություն։ Վարձակալության տրված տան համար ֆիզիկական անձը պետք է եկամտահարկ վճարի:
Այս մասին այսօր ասուլիսի ժամանակ հայտարարեց ՀՀ ՊԵԿ նախագահ Ռուստամ Բադասյանը՝ տեղեկացնելով, որ ՊԵԿ-ը փետրվարի 1-ից բնակարանների վարձակալության ուղղությամբ վարչարարություն է սկսելու:
Ըստ Բադասյանի, արդեն կան քաղաքացիներ, որոնք դեկտեմբերի ու հունվարի առաջին օրերի համար ներկայացրել են համապատասխան հայտարարություն, վերջիններս նաև տարեկան եկամուտների հայտարարագիր են ներկայացնելու։
«Արդեն ունենք 5 հազար քաղաքացի, որոնք արձագանքել են մեր կոչին ու ներկայացրել են հայտարարություն վարձակալական հարաբերությունների մասին։ Կոչ եմ անում քաղաքացիներին կամավոր ներկայացնել հայտարարություն, որ խուսափեն մեծ տուգանքներից։ Քիչ-քիչ հարկ վճարելու մշակույթը պետք է զարգացնել, որ քաղաքացին չափսոսա հարկը վճարել։ Ի վերջո, այդ գումարն օգտագործվում է սոցիալական, անվտանգային, մի շարք այլ հանրային նշանակություն ունեցող ծրագրերի իրականացման նպատակով»,-ասաց Ռուստամ Բադասյանը։
ՊԵԿ-ը վարձակալությունների գործընթացը վերահսկելու բավարար գործիքակազմ ունի: Ուշադրության կենտրոնում կպահեն վարձակալությունների մասին հայտարարությունները, ինչպես նաև պետական մարմիններից ստացվող տեղեկությունները։
Ռուստամ Բադասյանն ասաց՝ բոլոր տվյալները կհավաքագրվեն, այնուհետ ՊԵԿ-ը փետրվարի 1-ից սկսելով վարչարարությունը, առաջին փուլում կկենտրոնանա նորակառույց շենքերի վրա։