ՌԴ Նովգորոդի մարզում խոշոր վթար է տեղի ունեցել։ Մ-11 մայրուղու վրա բախվել է շուրջ 50 ավտոմեքենա, կան զոհեր ու տուժածներ։ Այս մասին հաղորդում է ՌԻԱ Նովոստին՝ Նովգորոդի մարզի նահանգապետ Անդրեյ Նիկիտինի թելեգրամյան ալիքին հղումով։
Նշվում է, որ ՌԴ արտակարգ իրավիճակների նախարարության և աղետների բժշկության կենտրոնի ուղղաթիռները մեկնել են տեղի ունեցած խոշոր վթարի վայր։ Ըստ ՌԴ առողջապահության նախարարության տվյալների, մարզի հիվանդանոցներ են տեղափոխվել տասը տուժած, այդ թվում՝ երկու երեխա, որոնցից մեկի վիճակը գնահատվում է ծանր, մյուսինը՝ միջին ծանրության։ Հոսպիտալացված մեծահասակների վիճակը գնահատվում է միջին ծանրության։
Երթևեկությունը դեպի Մոսկվա արգելափակված է։ Տեղում աշխատում է ընդհանուր առմամբ 45 մասնագետ և 15 տեխնիկա։
ՌԴ դատախազությունն ու Քննչական կոմիտեի մարզային վարչությունը ստուգումներ են կազմակերպել։ Վթարի վայրում աշխատում են պետավտոտեսչության ու ՌԴ ԱԻՆ-ի աշխատակիցները և քննչական խումբը։
