Առնվազն 13 պաղեստինցի է զոհվել ուրբաթ առավոտյան Գազայի հատվածի հյուսիսում գտնվող Ջաբալիա փախստականների ճամբարի և անկլավի հարավում գտնվող Խան Յունիս քաղաքի վրա իսրայելական ռազմական ավիահարվածների հետևանքով:
Այս մասին հաղորդել է WAFA պաղեստինյան լրատվական գործակալությունը:
Ըստ աղբյուրի, իսրայելական անօդաչու թռչող սարքերի հարվածների հետևանքով հինգ խաղաղ բնակիչ է զոհվել Ջաբալիա փախստականների ճամբարից արևմուտք՝ անկլավի հյուսիսում գտնվող Ալ-Ֆալուջայի գերեզմանատանը:
«Իսրայելական զինվորականները շարունակել են օդային և հրետանային հարձակումները Գազայի հատվածի հարավում գտնվող Խան Յունիսում բնակելի շենքերի վրա: Արդյունքում առնվազն ութ խաղաղ բնակիչ է զոհվել, ևս մի քանիսը վիրավորվել է»,- հաղորդել է գործակալությունը։
Ըստ WAFA-ի՝ իսրայելցի զինվորականները «ծխային նռնակներ» են արձակել Գազայի կենտրոնում, իսկ իսրայելական անօդաչու թռչող սարքերը կրակոցներ են արձակել Գազայի կենտրոնական հատվածի տարբեր շրջաններում։ Հրետակոծության հետևանքով ևս մի քանի մարդ վիրավորվել է։
