Մենք արդեն իսկ ունենք «Աջափնյակ» կայարանի ամբողջական նախագիծը, և նախագիծն այս պահի դրությամբ համալիր փորձաքննության փուլում է: Այդ մասին տարեվերջյան ասուլիսի ժամանակ ասաց Երևանի քաղաքապետ Տիգրան Ավինյանը՝ անդրադառնալով մետրոպոլիտենի նոր կայարանի կառուցման ընթացքին:
Ըստ Ավինյանի՝ համալիր փորձաքննություն անցնելուց հետո Կառավարության հետ կքննարկվեն նաև համատեղ ֆինանսավորման աղբյուրները:
«Որոշակի ֆինանսավորում 2024 թվականի համար արդեն իսկ Կառավարությունը նախատեսել է, ուզում եմ տեղեկացնել, որ այս ծրագիրը ֆինանսավորվելու է ամբողջապես Կառավարության կողմից: Եվ այդտեղ նաև բոլոր գործընկերներին ուզում եմ շնորհակալություն հայտնել, որ մենք արդեն իսկ իրական նախագիծ ունենք առաջին՝ նոր մետրոյի կայարանի, որի շինարարությունը 2024-ին պետք է մեկնարկի»,- ասաց նա:
Ըստ Ավինյանի՝ ընդհանուր նախագծի արժեքը մոտավորապես 220-240 միլիոն դոլարի շրջանակներում է:
