ԱՄՆ նախագահ Ջո Բայդենի որդին՝ Հանթեր Բայդենը, կներկայանա 2024 թվականի հունվարի 11-ին Կալիֆորնիայի դաշնային շրջանային դատարան՝ 1,4 միլիոն դոլարի հարկերից խուսափելու գործով։
Կալիֆորնիայի Կենտրոնական շրջանի Դաշնային դատարանի ժամանակացույցի համաձայն՝ այս գործով առաջին նիստը նշանակված է հունվարի 11-ին՝ տեղական ժամանակով ժամը 13:00-ին (հունվարի 12-ին՝ ՀՀ ժամանակով 01:00-ին):
Դեկտեմբերի սկզբին Հանթեր Բայդենին մեղադրանք է առաջադրվել հարկերից խուսափելու ինը կետով: Մասնավորապես, նա մեղադրվում է առնվազն 1,4 միլիոն դոլար դաշնային հարկերից խուսափելու սխեմային մասնակցելու մեջ: Ամերիկացի առաջնորդի որդուն նաև մեղադրում են կեղծ հարկային հայտարարագրեր ներկայացնելու մեջ։ Fox News-ի տվյալներով՝ նրան կարող է սպառնալ 17 տարվա ազատազրկում։ Դատախազները կարծում են, որ Հանթեր Բայդենը միլիոնավոր դոլարներ է ծախսել «շռայլ ապրելակերպի վրա՝ հարկեր վճարելու փոխարեն»:
Նրան նախկինում մեղադրանք է առաջադրվել զենքի հետ կապված երեք հանցագործության համար։ Նախագահի որդուն մեղադրում են հրազեն գնելիս ստելու և լիցենզավորված դիլերին կեղծ տեղեկություններ տրամադրելու մեջ։ Երրորդ մեղադրանքը վերաբերում է օրենքի խախտմանը, որն արգելում է թմրամոլներին հրազեն ունենալ:
Հանթեր Բայդենի նկատմամբ հետաքննությունը զենք պահելու համար սկսվել է 2018 թվականին, երբ հայտնի դարձավ, որ նա այդ ժամանակահատվածում թմրանյութ է օգտագործել և ուներ Colt Cobra ատրճանակ։
Ամերիկյան օրենսդրությունն արգելում է մարդկանց, ովքեր թմրանյութեր են օգտագործում կամ տիրապետում, զենք գնել կամ պահել: Բացի այդ, այդ ժամանակահատվածում Դեմոկրատական կուսակցությունը ներկայացնող ԱՄՆ ներկայիս նախագահի որդին անտեսել է իշխանությունների՝ հարկեր վճարելու պահանջները։ Հանթեր Բայդենի գործով դատախազության որոշումները, որոնք թույլ են տվել նրան խուսափել բանտից, վրդովմունքի փոթորիկ են առաջացրել Հանրապետական կուսակցության ընդդիմադիր շատ անդամների մոտ։
