«Մեր չորս հարևաններից երկուսի հետ մեր ճանապարհները բաց են, ինչը վկայում է նրանց հետ մեր ունեցած հարաբերություններ բարեկամական լինելու մասին: Մեր հարևաններից երկուսի հետ մեր ճանապարհները փակ են, ինչը հարաբերություններում առկա բարդությունների շատ խոսուն վկայությունն է: Ես այսօր չեմ եկել պատմելու մեր ունեցած բարդ հարաբերությունների մասին, այլ ուզում եմ ասել, որ առանց ճանապարհների շատ դժվար կլինի կառուցել խաղաղություն»,- Թբիլիսիի «Մետքասի ճանապարհ» միջազգային համաժողովի իր ելույթում ասաց վարչապետ Նիկոլ Փաշինյանը:
Վարչապետը շեշտեց, որ Հարավային Կովկասն ունի հաստատուն խաղաղության կարիք. «Ինչ է խաղաղությունը, դա մի վիճակ է, երբ երկրներն ապրում են բաց սահմաններով, տնտեսական, քաղաքական, մշակութային, մարդկային ակտիվ կապերով կապված, բոլոր հարցերը դիվանագիտական եղանակով լուծելու փորձ և ավանդույթ կուտակած: Սա է իրական խաղաղությունը և ինչպես տեսնում եք՝ այդ ամենը, այսինքն՝ բաց սահմանները, տնտեսական, քաղաքական, մշակութային կապերը հնարավոր չեն առանց ճանապարհների: Այս է պատճառը, որ մեր կառավարությունը մշակել և ներկայացնում է «Խաղաղության խաչմերուկ» նախագիծը՝ որպես խաղաղության օրակարգի կարևոր մի մաս: Այդ նախագծի առանցքային իմաստը՝ Հայաստանի, Թուրքիայի, Ադրբեջանի, Իրանի միջև կոմունիկացիաների զարգացումն է ճանապարհներ, երկաթուղիներ, խողովակաշարեր, մալուխներ կառուցելու, գործարկելու միջոցով»: