Հոկտեմբերի 20-ին արտառոց դեպք է տեղի ունեցել Արարատի մարզում:
ՀՀ ՆԳՆ ոստիկանության Արարատի մարզային վարչություն տեղեկություններ են ստացվել, որ այդ օրը «Վեդիի» ծննդատանը երեխա է ծնվել, ում մայրը, երեխային թողնելով հիվանդանոցում, հեռացել է՝ ասելով, որ ինքը հրաժարվում է երեխայից:
Ինչպես հայտնում է shamshyan.com-ը, հիվանդանոց են ժամանել իրավապահները, որոնք պարզել են, որ նույն օրը՝ ժամը 12:00-ի սահմաններում, Արարատի մարզի գյուղերից մեկի բնակիչ, 20-ամյա Ս. Ս.-ն Վեդիի ծննդատանը տղա երեխա է ծննդաբերել և հրաժարվել երեխայի խնամքի պարտականությունը կատարելուց՝ երեխային թողնելով ծննդատանը ու հեռացել է այնտեղից:
Դեպքի փաստով Ոստիկանության Արարատի բաժնում փաստաթղթեր են ձևակերպվել, որոնք փոխանցվել են Վեդիի քննչական բաժին:
Կայքի տեղեկություններով, ոստիկանները ճշտել են մոր բնակության վայրը և ձեռնարկում են միջոցառումներ՝ նրան հայտնաբերելու և քննչական բաժին ներկայացնելու համար:
