Այսօր ՔՊ նախընտրական շտաբը հայտարարություն էր տարածել, որում նշվում էր, որ «Ազգային առաջընթաց» կուսակցության կազմում քաղաքապետի թեկնածու առաջադրված Հայկ Մարությանը ոչ միայն հրաժարվել է Հանրային հեռուստաընկերության եթերում մասնակցել բանավեճի` պատճառաբանության մեջ նշելով իրենց վերաբերմունքը լրագրող Պետրոս Ղազարյանի նկատմամբ, այլև մերժել է Factor.tv լրատվամիջոցի եթերում մասնակցել բանավեճի։
Օրեր առաջ Տիգրան Ավինյանին առաջարկվել է մասնակցել Factor.tv-ի եթերում կայանալիք բանավեճին՝ քաղաքապետի թեկնածուների միջև։ Հարցին, թե ո՞ր թեկնածուներն են մասնակցում, և արդյոք մասնակցո՞ւմ է Հայկ Մարությանը, Factor.tv-ից պատասխանել են, որ Հայկ Մարությանը հրաժարվել է բանավեճից։
Քարոզարշավի ընթացքում Հայկ Մարությանի մամուլի քարտուղարի պարտականությունները կատարող Հովսեփ Կուբաթյանը իր ֆեյսբուքյան էջում գրել է, որ Factor.tv-ի կողմից նախընտրական բանավեճի հրավեր, մասնակցության ձևաչափի, ամսաթվի և այլ պայմանների մասին խոսակցություն չի եղել։ Ըստ նրա՝ Factor.tv-ն միայն այսօր է, որ բանավեճ կազմակերպելու առաջարկ է ուղարկել իրենց: «Քանի որ քարոզչությանն ընդամենը մեկ օր է մնում, և վերջին օրվա միջոցառումների, այդ թվում՝ մամուլի հետ շփումների գրաֆիկն արդեն նախօրոք կազմված է եղել, դրանում հապճեպ փոփոխություններ մտցնելը նպատակահարմար չենք համարում»,- գրել է նա։
Ստացվում է, որ Հայկ Մարությանը 3-րդ անգամ հրաժարվում է Ավինյանի հետ բանավիճել. այս անգամ պատճառը «սուղ ժամանակն է»։