Վիտալի Բալասանյանի ձերբակալման իրավաչափության հետ կապված բողոք է ներկայացվել դատարան։ Ժամը 13.00-ին դատական նիստ է նշանակված։
Այս մասին «Ֆեյսբուք»-ի իր էջում գրել է փաստաբան Ռաֆայել Մարտիրոսյանը։
Հիշեցնենք, որ Արցախի ԱԽ նախկին քարտուղար Վիտալի Բալասանյանը ձերբակալվել է հուլիսի 13-ի երեկոյան։
Հայտնի է դարձել նաև, որ ձերբակալվել են վերջինիս որդին և ազգականը: Գեներալին ձերբակալել են Ասկերանի իր տնից:
Ավելի ուշ Բալասանյանի որդու ձերբակալման վերաբերյալ պարզաբանմամբ է հանդես եկել Արցախի Հանրապետության գլխավոր դատախազությունը։
Ըստ դատախազության, ԱՀ գյուղի և գյուղատնտեսության աջակցության հիմնադրամը դիմել է դատախազություն առ այն, որ հիմնադրամի հոգաբարձուների խորհրդի 2021 թվականի հունիսի 14-ի որոշմամբ Ասկերան քաղաքի բնակիչ Ա. Բ.-ին նպատակային փոխառության պայմանագրով տրամադրվել է 74.500.000 (յոթանասունչորս միլիոն հինգ հարյուր հազար) ՀՀ դրամ փոխառություն՝ մեղվաընտանիքներ ձեռք բերելու նպատակով, սակայն փոխառու Ա.Բ.-ի կողմից նպատակային փոխառության պայմանագրով տրամադրված գումարը օգտագործվել է ոչ նպատակային, մեղվաընտանիքներ ձեռք չեն բերվել։
Հարուցվել է քրեական գործ։
