Երբ սիրահարված տղան փորձում է համբույր ստանալ իր սիրելի աղջկանից, ոչինչ չի խնայի նրան սիրաշահելու համար. սա է հնդիկ երգիչ Գուրիի տեսահոլովակի սյուժեն, որի հերոսուհուն մարմնավորել է դերասանուհի Ժաննա Բուտուլյանը։
Հնդիկ երգիչն իր աշխատանքային թիմի հետ ժամանել է Հայաստան այստեղ տեսահոլովակ նկարահանելու նպատակով։ Ժաննա Բուտուլյանին ընտրել են հայաստանյան գործընկերների միջոցով։
Իսկ թե ինչու է ստեղծագործական թիմը որոշել հասնել Հայաստան ու այստեղ տեսահոլովակ նկարահանել, Ժաննան հստակ չգիտի, բայց շեշտեց, որ նրանք սիրում են հայերին։
Հնդկական տեսահոլովակում նկարահանվելը Ժաննայի առաջին փորձն է ներկայանալու արտերկրի շուկայի համար նախատեսված նախագծում։ Արդյոք սա իր համար ճանապարհ կբացի դեպի Բոլիվուդ, դերասանուհին չշտապեց գնահատել։
Գուրին Հնդկաստանում սկսնակ երգիչ է, բայց արդեն հասցրել է շատ սիրվել։ Ինստագրամում նա 1.8 մլն հետևորդ ունի։
Տեսահոլովակի նկարահանումներն իրականացվել են Երևանում, Բյուրականում և Ազատի ջրամբարում։ Ամբողջ ընթացքում սիրահարված տղան փորձում է համբույր ստանալ սիրելիից։
Իսկ դա նրան հաջողվո՞ւմ է, թե ոչ, Ժաննան առայժմ չի բացահայտում։ Chumma`«Պաչիկ» կոչվող երգի տեսահոլովակի պրեմիերան ապրիլի 26–ին է, լսարանը տեսնելու հնարավորություն կունենա։
