Թուրքիան հաջողությամբ հաղթահարել է իր պատմության ամենակարևոր ընտրական գործընթացներից մեկը։ Այս մասին հայտարարել է նախագահ Ռեջեփ Թայիփ Էրդողանը` դիմելով աշխարհի 78 երկրների ներկայացուցիչներին, որոնք Անկարա են ժամանել Թուրքիայի ղեկավարի երդմնակալության կապակցությամբ: Այս մասին գրում է Anadolu գործակալությունը։
Երկրի ղեկավարը շնորհակալություն է հայտնել համաքաղաքացիներին վստահության և առաջիկա հինգ տարիներին երկրին ու ժողովրդին ծառայելու հնարավորության համար։
«Մենք պատրաստ ենք ծառայել Թուրքիայի 85 միլիոն քաղաքացիներից յուրաքանչյուրին՝ անկախ նրանց քաղաքական հայացքներից, ազգային պատկանելությունից և կրոնից։ Եկեք շարունակենք ծառայել Թուրքիային»,- վստահեցրել է Էրդողանը։
Նա կոչ է արել երկրի 85 միլիոնանոց բնակչության յուրաքանչյուր բնակչի միավորվել։
«Թուրքիայի Հանրապետության հիմնադրման 100-ամյակին մեր երկրին միասնություն է պետք։ 81 մարզերից յուրաքանչյուրի ժողովրդին կոչ եմ անում համերաշխության և միասնության։ Այսօր հասարակության հազարամյա կապերը համախմբելու և ամրապնդելու ժամանակն է, մեր երեխաների լուսավոր ապագայի համար աշխատելու ժամանակը։ Մենք պատրաստ ենք կատարել նախընտրական շրջանում ընտրողներին տրված բոլոր խոստումները, ինչպես դա անում ենք վերջին 21 տարիներին»,- ասել է նա։
Նախագահը հորդորել է հակառակորդներին մի կողմ թողնել ընտրական շրջանի հակասությունները և համատեղ իրականացնել «Թուրքիայի հարյուրամյակի» հայեցակարգը։
«Մենք վճռական ենք կյանքի կոչել Աթաթուրքի կարգախոսը՝ «Խաղաղություն տանը, խաղաղություն աշխարհում», մենք կընդլայնենք հումանիտար դիվանագիտության շրջանակը»,- ասել է Թուրքիայի նախագահը։
