Հարավային Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Խավիեր Կոլոմինան «Թվիթեր»-ի իր միկրոբլոգում անդրադարձել է Հայաստան կատարած աշխատանքային այցին:
Կոլոմինան Երևանում վարչապետ Նիկոլ Փաշինյանի, ԱԳ նախարար Արարատ Միրզոյանի և ԱԽ քարտուղար Արմեն Գրիգորյանի հետ կայացած հանդիպումները համարել է դրական։
«Քննարկվել են ՆԱՏՕ-Հայաստան համագործակցության և տարածաշրջանային անվտանգության դինամիկան բարձրացնելու ուղիները, մասնավորապես՝ Հայաստանի և Ադրբեջանի միջև խաղաղության գործընթացի ներկա իրավիճակը վերջին բանակցություններից հետո»,- գրել է նա:
Ավելի վաղ հայտնել էինք, որ ՆԱՏՕ-ի գլխավոր քարտուղարի քաղաքական հարցերով օգնականի տեղակալ, Կովկասում և Կենտրոնական Ասիայում ներկայացուցիչ Խավիեր Կոլոմինան Հարավային Կովկասի տարածաշրջան այցի շրջանակներում այսօր կժամանի Վրաստան։
