«Մեզ նման փոքր երկրները աշխարհակարգի փոփոխության մեջ կարող են մանրադրամ դառնալ, եթե սթափ ու հաշվարկված քաղաքականություն վարելու փոխարեն փորձենք հակամարտության այս կամ այն կողմի գործիք դառնալ»: Այս մասին այսօր՝ մայիսի 23-ին, ԱԺ հայտարարությունների ժամին հայտարարեց «Քաղաքացիական պայմանագիր» խմբակցության պատգամավոր Գուրգեն Մելքոնյանը:
Նրա խոսքով՝ երբ արցախահայերը գոյաբանական վտանգի առջև են կանգնած, երբ Հայաստանի ինքնիշխան տարածքից հարյուրավոր կիլոմետրեր օկուպացված են թշնամու կողմից և վտանգ է սպառնում անգամ մեր պետությանը, միակ բանը, որ պետք է անել, համախմբվելն է. «Անհրաժեշտ է մի կողմ դնել անձնական ու խմբակային շահերը և միավորվել: Այս պարզ ճշմարտությունը կարծես թե ընկալելի չէ օտար շահերը սպասարկող 5-րդ շարասյան համար: Սրանք իրենց օտարերկրյա տերերին հաճոյանալու և իշխանությունը զավթելու իրենց վաղեմի երազանքն իրականացնելու համար գնում են ցանկացած քայլի՝ չխորշելով անգամ իրենց կեղտոտ խաղերի համար օգտագործել պատերազմում զոհված մեր նահատակների արյունն ու նրանց ծնողների վիշտը: Այսօր Հայաստանում ներքին անկայունություն ստեղծելու ցանկացած փորձ պետք է դիտարկվի որպես պետական դավաճանություն և արժանանա համարժեք պատասխանի»:
