Վաշինգտոնում առաջընթաց եղավ՝ խաղաղության պայմանագրի 2 հոդված համաձայնեցրել ենք Ադրբեջանի հետ։ Մի քանի այլ հոդվածների շուրջ հնարավոր եղավ անկեղծ խոսակցություն ծավալել:
Այս մասին այսօր Միացյալ Թագավորության Եվրոպայի հարցերով պետնախարար Լեո Դոքերթին հետ համատեղ հարցազրույցի ընթացքում նշել է ՀՀ ԱԳՆ Արարատ Միրզոյանը։
«Վերահաստատում եմ Հայաստանի հանձնառությունը՝ հաստատել երկարատև, կայուն և արժանապատիվ խաղաղություն Հարաային Կովկասում։ Բանակցություններում Հայաստանը ներգրավված է շատ կառուցողական, բայց մենք միայնակ չենք կարող, այս քայլերը պետք է լինեն փոխադարձ»,- նշել է Արարատ Միրզոյանը։
«Կարող եմ ասել, որ այդ խոսակցությունների ընթացքում կողմերը շատ լավ են հասկանում մեկը մյուսի մտադրությունները և պատկերացումները։ Բացի նշածս երկու հոդվածից, կարծում եմ, մյուս հոդվածների մասով ևս հավանականություն կա համաձայնության։ Կան հոդվածներ և թեմաներ, որտեղ կողմերի դիրքորոշումները դեռ բավականին հեռու են իրարից։ Սրանք այն հոդվածներն են, որոնք առնչվում են ամենադժվար խնդիրներին»,- ընդգծել է ԱԳ նախարարը:
Ըստ Միրզոյանի, Հայաստանի համար սկզբունքային է սահմանազատման գործընթացում որոշակիություն ունենալը:
Ավելի վաղ տեղեկացրել էինք, որ մեկնարկել է Մեծ Բրիտանիայի և Հյուսիսային Իռլանդիայի Միացյալ Թագավորության՝ Եվրոպայի հարցերով պետնախարար Լեո Դոքերթիի այցը Հայաստան:
