«Իմ որդին օրենքով սահմանված իր բոլոր քրեադատավարական գործառույթները կատարել է. քննիչի հարցերին պատասխանել է, դատաբժշկական փորձաքննության գնացել է, առերեսման գնացել է: Ես իմ որդուն առնչվող քրեական գործի ընթացքից ընդհանրապես տեղյակ չեմ: Գործի մասին միակ աղբյուրը, որից ես տեղեկացել եմ, իմ որդին է»:
Այս մասին այսօր հրավիրված ասուլիսի ժամանակ պատասխանելով լրագրողի՝ Աշոտ Փաշինյանի առևանգման մասին հարցին՝ ասաց ՀՀ վարչապետ Նիկոլ Փաշինյանը: Լրագրողը հարց էր ուղղել՝ դիտե՞լ է վարչապետը իր որդու՝ իրեն առևանգելու համար մեղադրվող կնոջ ավտոմեքենան նստելու տեսանյութը:
Փաշինյանը հայտնեց, որ չի տեսել տեսանյութը, որում երևում են մեքենան նստելու և մյուս կադրերը: Լրագրողի դիտարկմանը՝ կարո՞ղ է հենց այդ պահին դիտել տեսանյութը և հորդորել իր որդուն դիմումը հետ վերցնել, վարչապետը պատասխանեց.
«Կարող եմ դիտել տեսանյութը, բայց չեմ կարող հորդորել դիմումը հետ վերցնել: Դուք հիմա լո՞ւրջ եք էդ հարցը բարձրացնում. եթե չկա հանցակազմ, թող գործը կարճեն, եթե կա հանցակազմ, թող գործն ուղարկեն դատարան, դատարանն էլ որոշումը կայացնի: Ո՞նց եք պատկերացնում ձեր ասածը, ուզում եք գործը տեղափոխել տղայական հարթությո՞ւն էլի: Ի՞նչ տղայավարիի մասին է խոսքը, սա պետություն է: Մենք պետք է էմոցիոնալ ժողովրդից տեղափոխվենք օրինապաշտ ժողովրդի: Բա փոխգնդապետի գլխին շշով խփեն, ասենք՝ լավ, եկեք ներենք կամ դիմումը հետ վերցնենք, մի ձև գտնենք կարճենք, օրինակ՝ զղջման հիմքով: Էնպես չի, որ նախորդ դեպքում գործն ապօրինի է կարճվել, զղջումը հիմք է կարճելու համար: Մարդ առևանգեն… էդ մարդիկ չէի՞ն խոսում մանկապարտեզ գրավելու համար, հետո էլ գնալու եք էդ մանկապարտեզի ծնողներին ասե՞ք՝ դիմումը հետ վերցրեք:
Դուք ձեր դիմումը հետ վերցրե՞լ եք»,- հարց ուղղեց լրագրողին ՀՀ վարչապետը:
Ստանալով բացասական պատասխան՝ Նիկոլ Փաշինյանը նշեց, որ կոչ է անում դիմումը հետ չվերցնել, բայց երբ ինքը դիմումը հետ կվերցնի, այդ ժամանակ կկարողանա հորդորել այլ մարդկանց դիմումը հետ վերցնել:
«Տեսանյութում երևում է, որ դուք գնացել մտել եք Հակոբ Արշակյանի կնոջ սուպի մեջ»,- նշեց Նիկոլ Փաշինյանը:
Հիշեցնենք՝ Լրագրող Փայլակ Ֆահրադյանը 2021 թվականի մարտի 18-ին ֆեյսբուքյան իր էջում հայտնել էր, որ «սրճարանում իր վրա է հարձակվել նախարար Հակոբ Արշակյանը»: Դատախազությունը գործն ուղարկել էր Հատուկ քննչական ծառայություն:
Արշակյանը միջադեպի պատճառով, իր դիմումի համաձայն, աշխատանքից ազատվել էր:
Հակոբ Արշակյանը միջադեպից հետո պարզաբանմամբ էր հանդես եկել՝ նշելով, որ ներողություն է խնդրում միջադեպին ներկա բոլոր քաղաքացիներից:
