Ադրբեջանը կրկին փորձում է հիմնավորել ԼՂ խաղաղ բնակչության դեմ հերթական ահաբեկչությունը կեղծ պնդումներով, որոնք արդեն իսկ ձախողվել են.
Այս մասին «Ֆեյսբուք»-ի իր էջում գրել է Հայաստանի հատուկ հանձնարարություններով դեսպան Էդմոն Մարուքյանը՝ ահաբեկչություն անվանելով այսօր ադրբեջանական դիվերսիոն խմբի հարձակումը:
«Դիվերսիոն խումբը հարձակվել և սպանել է Լեռնային Ղարաբաղում ծառայող 3 ոստիկանի, ևս մեկ ոստիկան հոսպիտալացվել է»,- հիշեցրել է Մարուքյանը:
Ինչպես հայտնի է՝ այսօր առավոտյան՝ ժամը 10։00-ի սահմաններում, ադրբեջանական զինուժի դիվերսիոն խումբը «Խայփալու» կոչվող տեղանքում թիրախավորել և կրակ է բացել ոստիկանության անձնագրային և վիզաների վարչության անձնակազմի հերթափոխի մեքենայի վրա։
Արցախի ՆԳՆ ոստիկանությունից հայտնում են, որ դիվերսիոն ներթափանցման հետևանքով զոհվել է ոստիկանության 3 ծառայող. նրանց ինքնությունը հայտնի է:
