ՔՊ խմբակցության պատգամավոր Արուսյակ Ջուլհակյանն ԱԺ նիստում անդրադարձավ ընդդիմադիրների ելույթներին. «Սկսեմ պարոն Արծվիկ Մինասյանի ապոկալիպտիկ հայտարարություններից՝ քաղհասարակությունը վերացրել եք, ինձ թվում է, որ քաղհասարակությունն իր տեղում է և բավականին բարեհաջող կերպով կատարում է իր կարևոր գործառույթը: Այդուհանդերձ, ես հիշեցի, որ մեր փառապանծ ընդդիմությունը հեղափոխությունից ի վեր թիրախավորել է մեր քաղհասարակությանը և տարբեր պիտակներ կպցնելով մեր քաղհասարակության տարբեր գործիչների, տարբեր կազմակերպությունների, փորձում է ամեն բան անել, որ նրանց թիրախավորելու միջոցով թիրախավորի հերթական անգամ իշխանությանը: Խոսում եք սորոսականության մասին, սա ձեր կողմից ներմուծված և թմբկահարված ամենասին, բայց միաժամանակ ամենազազրելի ակցիաներից մեկն է: Պարոն Արծվիկ Մինասյանը, ով այսօր այստեղից խոսում էր քաղհասարակությունը վերացնելու մասին, այս ամբիոնից հայտարարել է սորոսականության չարիքների մասին, եթե դա աներ ուրիշ մարդ՝ ես կհասկանայի, բայց դուք պարոն Մինասյան՝ կուլտուրական մարդ եք»:
Պատգամավորը խոսեց ընդդիմադիրների այն հայտարարության մասին, թե ներկայումս Հանրային խորհուրդը վերացվել է. «Ասում են հանրային խորհուրդը վերացրել եք, հանրային խորհուրդը, որ պետք է համերաշխություն ապահովեր մեր երկրում վերացել է: Ես չէ, որ պետք է ձեզ հիշեցնեմ, թե ինչ պայմաններում է հանրային խորհուրդը Հայաստանում ձևավորվել, ձևավորվել է մարտի 1-ից հետո, երբ սեփական ժողովրդի վրա կրակելուց հետո այնպիսի մեծ անջրպետ էր առաջացել իշխանության ու ժողովրդի մեջ, որ պետք էր մի մարմին, որը գոնե իմիտացիա կապահովեր այդ անջրպետը կամրջելու համար: Իհարկե դա այդ մարմնի մոտ չստացվեց, քանի որ այդ մարմնի ղեկավար էիք կարգել մեկին, որը դեռևս 90-ականներից աչքի է ընկել բռնության հանդեպ իր պաթոլոգիկ սիրով, մի մարդ, որը թե՛ 90-ականներին էր բռնության կոչերով հանդես գալիս, թե՛ պատերազմի ժամանակ հեղաշրջման կոչերով էր հանդես գալիս, թե՛ պատերազմից հետո արդեն ապստամբության կոչերով, մի մարդ, որը հայտարարում էր, որ գազազած ամբոխը պետք է հոշոտի Նիկոլ Փաշինյանին, այդ մարդուն էիք դուք կարգել Հանրային խորհրդի նախագահ: Պարոն Մինասյանը խոսում է այն մասին, որ պետք չէ վրեժխնդրության գնալ, ես իհարկե համաձայն եմ, որ պետք չէ, բայց ես կարծում եմ՝ բոլորս պետք է համաձայնենք մի կետում, որ մեր երկրում վերջապես պետք է հաստատվի պատժի անխուսափելիություն: Դա պետք է մենք ապահովենք և թույլ չտանք, որ անպատժելիության մթնոլորտը բերի նոր պառակտումների մեր հասարակության մեջ»:
Ջուլհակյանն անդրադարձավ «Հայաստան» դաշինքի պատգամավոր Գեղամ Մանուկյանի ելույթին. «Գեղամ Մանուկյանն ասաց, որ 90-ականներին Թուրքիան լռում էր, չէր համարձակվում խոսել: Բացառիկ տաղանդ պետք չէ հասկանալու համար 90-ականների և ներկայիս Թուրքիայի տարբերությունը: Երբ Մանուկյանն ասում է, եթե 90-ականներին Թուրքիան համարձակվում էր ծպտուն հանել, մենք այստեղից բամփում էինք, կներեք հարգելի գործընկերներ՝ զավեշտն ունի սահմաններ: Ասում են, որ Պրահայում ճանաչվել է Ադրբեջանի սահմանը: Ասեմ, որ այս սահմանները վաղուց են ճանաչվել, Պրահայում ոչ ոք հայտնագործություն չի կատարել: Խոսում եք հայ-ռուսական հարաբերությունների մասին: Թուրքիայի պաշտպանության նախարարը եսիմ ինչ ասի՝ ձեզ համար կարևոր է, երբ Լավրովը մեզ անվանում է օկուպանտ, ձեզ համար դա կարևոր չէ»: