Ուզում են կրկնել Հոկտեմբերի 27-ը. Ռուբիկ Հակոբյանի կոչով պետք է զբաղվեն իրավապահները

Խորհրդարանում Լաչինի միջանցքի փակման թեմայով հրավիրված լսումներն ավելի շատ ուղղված են Հայաստանում իշխանափոխություն իրականացնելու ձևերին ու հնարավոր սցենարներին։ Նախկին դաշնակ և նախկին պատգամավոր Ռուբիկ Հակոբյանն, օրինակ, առաջարկում է մահապարտների խումբ ձևավորել, որը կհեռացնի գործող իշխանություններին։

Քաղաքագետ Ռոբերտ Ղևոնդյանի կարծիքով՝ Ռուբիկ Հակոբյանի հայտարարությունը քաղաքական գնահատման առարկա չէ, իրավապահ մարմինները պետք է զբաղվեն այդ կոչով.«Ակնհայտորեն սա ուժի միջոցով հակասահմանադրական գործողություն իրականացնելու կոչ է, որով պետք է զբաղվեն համապատասխան մարմինները»,-«Առաջին լրատվական»-ի հետ զրույցում ասաց նա։

Կա՞ն հասարակության մեջ նմանատիպ տրամադրություններ, մեր զրուցակիցը պատասխանեց.«Մահապարտների խումբը հասարկությունը չի ձևավորում։ Դրանք հիմնականում շատ փոքր հատված են կազմում՝ մարգինալացված, հասարակության մեջ իր տեղը չգտած՝ ինչպես օրինակ հոկտեմբերի 27-ին Նաիրի Հունանյանն ու իր խումը, որոնք հասարակության մեջ բացասական վերաբերմունքի արժանացան։ Եթե իշխանությունների նկատմամբ կա դժգոհություն, ապա դրանք պետք է փոխվեն , ընտրությունների միջոցով։ Մենք գիտենք, որ վերջին տարիներին Հայաստանում ընտրություններն արտացոլում են հասարակության տրամադրությունները։ Նման պայմաններում Ռուբիկ Հակոբյանների նմաններին անհրաժեշտ չի լինի մահապարտների խումբ։Իսկ մահապարտների խումբը՝ հանցավոր համաձայնություն է իշխանություն զավթելու համար»,-նկատեց քաղաքագետը։

Ռոբերտ Ղևոնդյանը, հետևելով խորհրդարանում անցկացված լսումներին, կարծիք հայտնեց, որ սա ընդհանուր ընդդիմության տեսակետը չէ.«Այնտեղ մարդիկ էին, ովքեր տարբեր քաղաքական ուժեր էին ներկայացնում, այո՛ կային նաև հինգերորդ շարասյան ներկայացուցիչներ, նաև՝ մարդիկ, ովքեր իրենց անգրագիտությունը կամ իշխանությունների նկատմամբ բացասական վերաբերմունքն էին ի ցույց դրել։ Այդ մարդկանց համախումբը որոշակի առումով կարող է դրսից ուղղորդված լինել։ Այսինքն՝ հնարավոր է դրսից փորձեն ազդեցություն գործել Հայաստանում տեղի ունեցող գործընթացների վրա»,-եզրափակեց նա։

Սոցիոլոգ Կարեն Սարգսյանն «Առաջին լրատվական»-ի հետ զրույցում կարծիք հայտնեց, որ այն քաղաքական ուժերը, որոնք հավաքվել էին խորհրդարանում՝ վաղուց բավականաչափ վարկանիշ չունեն.«Եթե վաղն ընտրություններ կայայան, նրանք կա՛մ խորհրդարան մուտք չեն գործի, կա՛մ դժվարությամբ կհաղթահարեն անցողիկ շեմը։ Խոսքս «Հայաստան» դաշինքի մասին է, Վանեցյանի կուսակցությունն առհասարակ չկա։ Երկրորդ՝ այն օդիոզ անձինք, որոնք նստած էին այնտեղ՝ Սեյրան Օհանյանին օրինակ, լավ թափ տաս՝ ահագին զենք-զինամթերք դուրս կգա։ Նա շատ վաղուց է բանակը վարի տվել»։

Լսումներն, ըստ Սարգսյանի, ցույց տվեցին, թե իրենց իսկ ֆրակցիայի անդամներն իրար խոսքն ինչքանով են հարգում. «Նույնիսկ Սեյրան Օհանյանի ու Արծվիկ Մինասյանի՝ լուռ մնալու կոչերին որևէ մեկը բանի տեղ չէր դնում․ Արսենյան Գուրգենը դրական պերսոնաժ չէ, բայց նրա խոսքն անընդհատ ընհատվում էր, իսկ լուռ մնալու կոչերին որևէ մեկը չէր հետևում»։

Սոցիոլոգը վստահ է՝ նրանք ներկայացնում են Ռուսաստանի հինգերորդ շարասյունը , որն ունի Հայաստանն ապակայունացնելու նպատակ։

Ինչ վերաբերում է մահապարտներ հավաքելու կոչին, ապա մեր զրուցակցի խոսքերով, դա ակնհայտորեն կառավարության ուժային փոփոխության կոչ է.«Ուզում են կրկնել հոկտեմբերի 27-ը, բայց հիմնական տարբերությունն այն է, որ նրանց այդ գործողությունները որևիցե բան չեն նշանակում։ Նրանց մեջ չկա այնպիսի մարդ, որ գա իշխանության։ Իսկ նմանատիպ կոչ անողները տեղավորվում են ահաբեկիչների ցանկում, հետևաբար համապատասխան գործողություններ պետք է արվեն։ Նրանք, ովքեր ԱԺ-ում են, պետք է մնան, իսկ Ռոբերտ Քոչարյանն իր ընտանիքով պետք է նստի՝ մինչև հասկանանք, ով է կանգնած այդ հայտարարությունների հետևում։ Այսինքն խորհրդարանում եղածները մնան, բայց այնպես լինի, որ գնան տուն՝ դուռ բացող չլինի, մնացած բոլորը պետք է նստած լինեն»,-եզրափակեց Սարգսյանը։

Loading

Մի մոռացեք կիսվել Ձեր ընկերների հետ