Սպենդիարյանի անվան Օպերայի և բալետի ազգային ակադեմիական թատրոնի աշխատակիցներին գոհացրել է ՀՀ վարչապետ Նիկոլ Փաշինյանի հետ հանդիպումը:
«Այս պահին հանդիպմամբ բավարարված ենք, պարոն վարչապետն ասաց, որ անձամբ երաշխավորում է՝ այսօր որևէ մեկի վրա չեն դրվի այդ պարտականությունները, բացի Օպերայի թատրոնի փոխտնօրենից: Մենք այսօր կստանանք օրենքի այն կետերը, խնդիրները, որոնք կային:
Նախարարությունը ներկայացրել է վարչապետին մի մեծ ցուցակ, մենք գրավոր կպատասխանենք, նորից կհանդիպենք մեր հակափաստարկներով, բայց նա երաշխավորում է, որ որևէ մեկը դրսից չի գալու տնօրեն»,- լրագրողների հետ զրույցում նշեց դիրիժոր Հարություն Արզումանյանը:
Նա տեղեկացրեց՝ տնօրենի պարտականությունները ժամանակավորապես դրվում են փոխտնօրենի վրա, իսկ իրենք փորձելու են շուտ ներկայացնել հակափաստարկները, նաև այն, որ այդ փաստարկների մի մասն իրականությանը չի համապատասխանում: Վարչապետը խոստացել է՝ եթե պարզվի, որ այդ փաստարկների թեկուզ մի կետը կեղծ է, ներկայացնողը կպատժվի, կազատվի աշխատանքից:
