Քաղաքագետ Էդվարդ Անտինյանի կարծիքով՝ շարժումը, որը սկսել է ՍԴ աշխատակազմի նախկին ղեկավար Էդգար Ղազարյանը, դեռ չսկսված՝ կարող ենք համարել ավարտված:
«Շատ ափսոսում եմ այդ երիտասարդի համար: Եթե նա փորձում է առանձին շարժում ստեղծել, դրա հետ մեկտեղ կոնկրետ ժամկետներ է նշում, որ այդ օրվանից Նիկոլ Փաշինյանը չի ղեկավարելու երկիրը, նրան տանում է փակուղի: Ստացվում է՝ շարժումը դեռ չի սկսվել, բայց արդեն ավարտվել է: Հիմք չկա իր ասածներում: Ի՞նչը պետք է դրդի Նիկոլ Փաշինյանին հրաժարական տալ, ինչ-որ մեկի կո՞չը: Կամ ինքը ի՞նչ ռեսուրս ունի, մարդիկ ինչո՞ւ պետք է իրեն հետևեն»,- նկատում է քաղաքագետը:
Դիտարկմանը, որ «Հայրենիք» կուսակցության ղեկավար Արթուր Վանեցյանն իր աջակցությունն է հայտնել Ղազարյանին, հաշվի առնելով այս հանգամանքը՝ կարո՞ղ ենք ենթադրել, որ Վանեցյանը վերջնականապես կտրվել է իր նախկին թիմակիցներից և այժմ այլ «հանգրվան» է փնտրում, քաղաքագետն ասում է. «Եթե Արթուր Վանեցյանը կարծում է, որ հեղափոխությունը շեղվել է իր արժեքներից, բայց ինքը այդ արժեքների կրողն է, ապա կարող էր առանձին պայքար սկսել, այդ դեպքում միգուցե գտնվեին մարդիկ, որոնք կհավատային իրեն ու կմիանային այդ շարժմանը: Նրա հեղինակությունը բարձրացավ այն ժամանակ, երբ կատաղի պայքարում էր թալանչիների դեմ, բայց հետո գնաց ու միացավ այդ թալանչիներին, դրանից հետո ինչ էլ անի, ում հետ էլ միանա, արդյունք չի տալու»:
Ըստ Անտինյանի՝ քաղաքականության մեջ գործում է սակրավորի օրենքը՝ դու կարող ես սխալվել ընդամենը մեկ անգամ. «Կարող ես փորձել քո սխալն ուղղել, բայց այն չի ուղղվում: Դու ընդունում ես քո սխալը, բայց հասարակությունը չի ընդունում»:
Նկատառմանը՝ այսինքն, եթե Վանեցյանը ի սկզբանե միայնակ պայքարեր, չմիանար «Հայաստան» դաշինքին, կունենա՞ր հաջողություն, զրուցակիցը նշում է՝ դժվար է պատկերացնելը:
«Հաջողության համար Արթուր Վանեցյանին ամենակարևոր բանն էր պակասում՝ քաղաքական փորձառությունը. ուսադիրներով մարդիկ մի փոքր այլ տրամաբանության մեջ են խնդիրները պատկերացնում: Քաղաքական դաշտում իրենք շատ հարցերի պետք է պատասխանեն, որին պատրաստ չեն: Բացի դրանից, որքան էլ ինքը խոսում է բարձր արժեքներից, միևնույն է, կանգնելով Սերժ Սարգսյանի կողքին՝ այդ արժեքներն էլ չեն երևում: Սարգսյանից «պոկվելուց» հետո էլ մարդիկ հարցնելու են՝ ինչո՞ւ պետք է միանանք քեզ: Նույն խնդիրը կա այսօրվա շարժման հետ կապված. այսօրվա շարժման նախաձեռնողն էլ չի ասում, որ Հայաստանի ինքնիշխանությունը գերագույն արժեք է, դա սահմանադրական նորմ է, որևէ մեկը եթե ոտնձգություն է անում, ապա պետական հանցագործ է: Նա չի կարող լինել մի թիմի անդամ, որն ասում է՝ ՀՀ-ն պետք է զիջի իր անկախությունը հանուն անվտանգության՝ մտնելով Ռուսաստանի կազմի մեջ»,- ասում է Անտինյանը և հավելում՝ ընդդիմադիրներն իրենց պայքարի ընթացքում արժեզրկել են ՀՀ-ի անկախությունը:
Անդրադառնալով «Դիմադրություն» շարժման լռությանը և Իշխան Սաղաթելյանի հայտարարությանը, թե սեպտեմբերից շարժումը նոր թափ է ստանալու՝ վերջինս նկատում է՝ սեպտեմբերը քաղաքական առումով միշտ ակտիվ շրջան է եղել:
«Բայց այստեղ այլ հարց է. Իշխան Սաղաթելյանը ժամանակին ասում էր՝ մենք ամեն բան հստակ գծած ունենք, ժամկետների մասին էր խոսում, նշում էր՝ ինչ կատարվում է, մենք վերահսկում ենք: Այս երկարատև դադարն էլ էր իրենց գծա՞ծը: Այն, որ արդեն հասկանում են՝ առանց ժողովրդին ոտքի հանելու, հնարավոր չէ, դա էլ էր գծա՞ծ: Դուրս էին եկել փողոց, ամպագոռգոռ հայտարարություններ էին անում, թե Նիկոլ Փաշինյանը այլևս վարչապետ չէ: Այդպիսի անլուրջ հայտարարություններով ու մոտեցումներով ժողովուրդն ինչպե՞ս պետք է իրենց հավատար: Նույնիսկ իրենց կողքին կանգնածները հիասթափվեցին ու հետ քաշվեցին»,- ասում է քաղաքագետը:
Նրա խոսքով՝ երկրում ընդդիմությունն իշխանությունից լավը պետք է լինի, որ ցույց տա իշխանության սխալները ու դրանով ստանա հասարակական աջակցություն, սակայն այսօրվա ընդդիմությունն այնքան անլուրջ է, ուշք ու միտքն էլ նախկին բարքերի հետ բերելն է, որ չի կարողանում իր կողքին մարդ հավաքել:
Անդրադառնալով Իշխան Սաղաթելյանի այն հայտարարությանն էլ, թե պայքարի ընթացքում մի շարք ձեռքբերումներ են ունեցել՝ Անտինյանն ասում է՝ իրենք ձեռքբերում են համարում այն հանգամանքը, որ իբր թե կարողացել են կանխել իշխանության կողմից ստորագրվելիք նոր պայմանագիրը. «Եթե իրենք դա համարում են ձեռքբերում, ինչո՞ւ գնացին հանգստի: Ստացվում է՝ դուք չեք քաղաքական օրակարգը ձևավորում: Եթե պայքարում էիք, մինչև վերջ պայքարեիք»:
Հարցադրմանը՝ բացի խորհրդարանական ընդդիմությունից, հարթակում նոր ընդդիմադիր ուժեր կհայտնվե՞ն մոտակա ժամանակահատվածում, վերջինս ընդգծում է՝ հիմա հանրահավաքների ու ակցիաների ժամանակը չէ. «Ովքեր իրենց խոսքը ցանկանում են ասել հանրահավաքների միջոցով, խորը թյուրիմացության մեջ են: Բաժանված աշխարհի վերաբաժանում է շուտով լինելու: Ցանկացած պահի մեր պետականությունը վտանգված է: ՌԴ-ի հաղթանակից ու պարտությունից են կախված տարածաշրջանային փոփոխությունները: Այս պարագայում արտախորհրդարանական ուժերի միակ նպատակը պետք է լինի իրենց վերլուծություններով երկրին օգտակար լինելը: Այս պետությունը Նիկոլ Փաշինյանինը չէ, այլ բոլորինս»:
