Փաշինյանն այսօր Ազգային ժողովում դրական գնահատեց քննարկումների նոր դիսկուրսը ու նշեց, որ հին դիսկուրսին վերադարձ չկա։ Նա ասաց, որ հավանաբար որևէ վարչապետ չպետք է ասեր սա, բայց իրականությունն այն է, որ հիմա ասելու է։
«Ո՞րն է եղել որևէ իշխանության առաջին խնդիրը։ Առաջին խնդիրը եղել է իշխանությունը պահելը։ Եվ ամբողջ գործողությունների տրամաբանությունը ձևավորվել է այդպես»,- ասաց Փաշինյանը։
Ըստ վարչապետի՝ հենց այս պատճառներով եղել են ընտրությունների կեղծումներ, քաղբանտարկյալներ, կոռուպցիա, քաղաքական հետապնդումներ և այլն։
«Ես հույս ունեմ, որ Հայաստանի հանրությունը և ժողովուրդը գիտեն, որ մեր օրակարգում, իմ օրակարգում ընդհանրապես իշխանությունը պահելը ոչ միայն առաջին կետը չէ, այլև ընդհանրապես իմ օրակարգում այդպիսի հարց գոյություն չունի»,- ասաց Փաշինյանը։
