Ապրիլի 7-9-ը Արմավիրի մարզի Արաքս գյուղի մի տնից գողություն էին արել։ Բացել էին տան պատուհանը, մտել ներս ու գողացել հեռուստացույց, կահույք և հարսանեկան զգեստ։
Այս մասին տեղեկացնում է ՀՀ ոստիկանությունը:
Արմավիրի բաժնի քրեական հետախույզները ձեռնարկել են մի շարք օպերատիվ միջոցառումներ՝ բնակարանային գողությունը թարմ հետքերով բացահայտելու ուղղությամբ։
Օրեր անց ոստիկանները պարզել են, որ գողությունն արել են Սարդարապատ համայնքի երկու բնակիչ։ Ապրիլի 29-ին Արմավիր քաղաքի Հանրապետության փողոցում՝ գողացած հարսանեկան զգեստը վաճառելու պահին, նրանք բռնվել ու բերման են ենթարկվել ոստիկանության Արմավիրի բաժին։
Սարդարապատ գյուղի 25 և 28 տարեկան բնակիչները ներկայացվել են քննչական մարմնին։
Դեպքի հանգամանքները պարզվում են։
