«Պարոն Մինասյան, մանիպուլյացիաներից եք խոսում, բայց իսկական մանիպուլյանտը այստեղ դուք եք, որովհետև ներկայացնում եք այնպիսի թվեր, որոնք իրականության հետ ընդհանրապես կապ չունեն, և ներկայացնում եք այնպիսի գեղեցիկ տեքստեր, որ հաճոյանաք որևէ մեկին. ո՞ւմ եք ուզում հաճոյանալ»,- դիմելով «Հայաստան» դաշինքի պատգամավոր Արծվիկ Մինասյանին՝ ասաց Ջրային կոմիտեի նախագահ Կարեն Սարգսյանը:
Նա ներկայացրեց, իր խոսքով, իրական թվերը. «Եթե նմանատիպ լավ ջրառատ տարի ենք ունեցել, 2017 թվականին ինչո՞ւ են 100 մլն-ով ավելի ջրառ իրականացրել: Ես պատասխանում եմ տիկին Մկրտչյանի հարցին. արդյոք իրականում ուզում էին գումարնե՞ր աշխատել, դրա համա՞ր էին էդ քանակությամբ ջուր վերցնում: Եղել են նկարած թվեր, որպեսզի վերցնեք այդքան ջուր, այսօր իրական թվերն եմ ես ներկայացնում»:
Նա, դիմելով «Հայաստան» խմբակցության պատգամավոր Ավետիսյանին, նշեց. «Ես իմ անձնական մեքենայով վիրավորների և զոհվածների էի հանում Քարվաճառից, երբ դուք վախենում էիք Քարվաճառով մտնել, որովհետև երկու ճանապարհները ռմբակոծում էին: Էս ի՞նչ հանձնելու մասին եք խոսում, հիմա էլ՝ Սևանի հանձնելու: Սաղդ դարձել եք հայրենասեր, մենք էլ ստեղ Սևա՞ն ենք վաճառում»: Կարեն Սարգսյանը նշեց, թե իր ընտանիքը քանի զոհ է տվել անցած պատերազմների ընթացքում և 44-օրյա պատերազմում:
Հիշեցնենք, որ այսօր՝ օգոստոսի 17-ին, Ազգային ժողովում մեկնարկել է ԱԺ արտահերթ նիստ: Օրակարգում Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան և համալիր ծրագրերը հաստատելու ու լուծումներ կատարելու մասին օրենքի նախագիծն է: