Ադրբեջանն Իսրայելից 2 մլրդ դոլար արժողությամբ սպառազինություն գնելու բանակցություններ է սկսում՝ փոխանցում է իսրայելական Israelhayom պարբերականը:
Նշվում է, որ պաշտոնական Բաքուն բանակցություններ է սկսում Իսրայելի ռազմարդյունաբերական ընկերությունների հետ պայմանագրեր կնքելու նպատակով: Ադրբեջանի ու Իսրայելի միջև նոր գործարքի նպաստող գործոններից են երկու երկրների միջև ռազմական փոխգործակցության խորացումը, ինչպես նաև «Իսրայելում Ադրբեջանի առևտրի ու զբոսաշրջության պալատի բացումը»:
Այս գործարքից բացի, պաշտոնական Բաքուն իսրայելական ընկերությունների հետ այժմ բանակցություններ է վարում նաև բեռնափոխադրող օդանավերի հարցով՝ տարատեսակ սպառազինություն տեղափոխելու համար:
Իսրայելական պարբերականն ընդգծում է, որ միայն բեռնափոխադրման գործարքը, որն ակնկալվում է կնքել առաջիկա ամիսներին, կարժենա հարյուրավոր միլիոն դոլար:
Ավելի վաղ Թուրքիայի անկախ թղթակիցներից մեկը հայտարարել էր, որ Ադրբեջանի առևտրի ու զբոսաշրջության բյուրոյի հիմնադրումն Իսրայելում Ադրբեջանի դեսպանություն բացելու առաջին քայլն է: Այն իրականացնելու դեպքում Ադրբեջանը կդառնա Իսրայելում դեսպանություն ունեցող շիա մեծամասնությամբ երկրորդ երկիրը:
Մարտի 30-ին էլ Իսրայելում դեսպանություն էր բացել Բահրեյնը:
