Հայաստանի տնտեսությունը շարունակում է կրել կորոնավիրուսի ազդեցությունը։ Պարենային անվտանգությունից ելնելով՝ աշխարհում շատ ապրանքների արտահանման սահմանափակումները հայաստանյան թռչնամսի շուկայում խնդիրներ են առաջացրել, որը կհանգեցնի շուկայում թռչնամսի դեֆիցիտի։ Պատճառն այն է, որ ռչնաբուծարանները չեն կարողանում հավերի քանակն ապահովել, քանի որ նոր ճտերով չեն լրացվում:
Թռչնաբույծների միության նախագահ Սերգեյ Ստեփանյանն «Առաջին լրատվական»-ի հետ զրույցում նշեց պատճառները․«Մենք չենք կարողանում տարվա սկզբից ներկրել այն գլխաքանակը, որ ծրագրավորել էինք: Ռուսաստանում թռչնագրիպ է, Իրանն էլ ամեն ամիս ձգում է, ասում է՝ հաջորդ ամսվանից կբացենք արտահանումը: Մենք փաստորեն չենք կարողանում մեկ օրական ճտերի ներկրում կազմակերպել»,-ասաց նա:
Ստեփանյանի խոսքով՝ նախորդ տարի ռազմական գործողություններն ավարտից հետո սկսեցինք ներկրում իրականացնել, բայց ծայրը ծայրին հավիթ հասցրինք:
«Հիմա իրավիճակը գրեթե նույն ձևով կրկնվում է: Առաջին եռամսյակում մեր պահանջված գլխաքանակի ընդամենը 60 տոկոսն են կարողացել ներկրել, քառասուն տոկոսը չենք կարողացել: Հիմա եթե Վրաստանից ենք ներկրում, Վրաստանն այդքան հնարավորություն չունի, որովհետև պայմանագրով նաև Ադրբեջանին է մատակարարում»,-ասաց Ստեփանյանը:
Կառավարության միակ անելիքը, ըստ նրա, այն է, որ տոհմային տնտեսություն ստեղծի․«Մենք 4-5 տարի խնդրում ենք, որ աջակցեն, որ տեղում տոհմային տնտեսություն ստեղծենք և օրական ճտերը տեղում արտադրենք: Մանավանդ անցյալ տարի կորոնավիրուսի պայմաններում նման տնտեսության բացակայությունը շատ զգացնել տվեց: Նման դեպքերում տեղի տոհմային տնտեսությունը կարողանում է ապահովել վաճառքի գոնե 40 տոկոսը: Ստացվում է, որ մենք 60-70 տոկոսը դրսից ենք ներկրում։ Եվ այս պայմաններում միակ ելքը նա է, որ հավաքվենք, տնտեսություն ստեղծենք, մենք մեր սեփական ճուտն արտադրենք և կախված չլինենք դրսից»,-հավելեց Ստեփանյանը։
Նա նշեց, որ ընկերական մոտեցմամբ գնացել են Վրաստանից, Ռուսաստանի երկու մարզերից ինկուբացիոն ձու են բերել, ինչի արդյունքում շուկայում ձվի գինը սկսել է աստիճանաբար իջնել․ «Բայց այս վիճակն անընդհատ տատանվելու է, մեկ ձու չկա, մեկ թանկ է, անընդհատ լարված վիճակ է»
Հարցին՝ ինչու կառավարությունը այսպիսի տնտեսություն չի ստեղծում, Ստեփանյանը նշեց, որ երկու անգամ այդ ծրագիրը ներկայացրել են, կառավարությունը, սակայն, ասում է՝ ծրագրի 40 տոկոսը կապահովենք, մնացածը դուք ապահովեք, մինչդեռ մեր տնտեսությունները գումար չունեն ներդրումներ անելու, որովհետև տոհմային գործի համար մի քանի տարի է պետք, որ ներդրված գումարը հետ գա,դրա համար քայլ պետք է անի կառավարությունը։
