ՀՀ-ն ու ԱՄՆ-ը կարող են համատեղ աշխատել ցեղասպանությունները կանխարգելելու և մարդու իրավունքները խթանելու ուղղությամբ. ԱՄՆ պետքարտուղարություն

ԱՄՆ-ում ՀՀ դեսպանությունը հյուրընկալել էր երկրի գործադիր ու օրենսդիր ճյուղերի ներկայացուցիչներին, օտարերկրյա դեսպաններին ու ամերիկահայ շրջանակներին դեսպան Ներսիսյանի՝ ԱՄՆ-ում դիվանագիտական առաքելության ավարտման կապակցությամբ. գրում է VOA-ն: ԱՄՆ Կոնգրեսում հայկական հանձնախմբի համանախագահ, կոնգրեսական Ջեքի Սփիեռի կարծիքով՝ ԱՄՆ-ում ՀՀ հեռացող դեսպան Վարուժան Ներսիսյանին բաժին էր հասել ծանր փորձություն, հատկապես ղարաբաղյան պատերազմի օրերին:

Կոնգրեսականը հայկական հանձնախմբի մեկ այլ համանախագահ, կոնգրեսական Ֆրենք Փալոնի հետ մասնակցել է դեսպան Ներսիսյանի դիվանագիտական առաքելության ավարտի առիթով Վաշինգտոնում Հայաստանի դեսպանությունում կազմակերպված ընդունելությանը:

Իր ելույթում կոնգրեսական Սփիեռը շեշտել է՝ մեծ ջանքեր են գործադրվել ամերիկյան օժանդակության ապահովման ուղղությամբ: Հպարտ եմ ասել, որ ձեր օժանդակությամբ ավելացրել ենք Հայաստանի ֆինանսավորումն ականազերծման և մարդասիրական օգնության համար: Նա նաև կարևորել է ԱՄՆ-ի կողմից Հայոց ցեղասպանության ճանաչման փաստը: «Վերջապես, ավելի քան մեկ դար անց Միացյալ Նահանգները՝ ի դեմս Կոնգրեսի և ԱՄՆ նախագահի, նպատակահարմար գտան ճանաչել Հայոց ցեղասպանությունը, որի ուղղությամբ հայությունը մեծ ջանքեր է գործադրել երկար ժամանակ»,- հայտարարեց կոնգրեսական Սփիեռը:

Ընդունելության բազմաթիվ հյուրերի շրջանում էին նաև ԱՄՆ պետքարտուղարության ու Պենտագոնի ներկայացուցիչները: Փոխպետքարտուղարի տեղակալի պաշտոնակատար Ջոն Արմստրոնգն իր խոսքում բարձր է գնահատել դեսպանի ու ՀՀ դիվանագիտական առաքելության գործունեությունը՝ առանձնահատուկ նշելով Ներսիսյանի աջակցությունն ԱՄՆ-ի նախագահի կողմից Հայոց ցեղասպանության ճանաչման ժամանակ: «Մենք պետք է ճանաչենք ճշմարտությունը նույնիսկ այն ժամանակ, երբ դա ցավալի է»,- շեշտել է ամերիկացի բարձրաստիճան դիվանագետը, որն իր խոսքում նաև պետքարտուղարության անունից ցավակցություն է հայտնել հայ ժողովրդին անցած տարվա պատերազմի զոհերի կապակցությամբ:

«Մեր երկու երկրները համատեղ աշխատում են և կարող են աշխատել աշխարհում ցեղասպանության կանխարգելման և մարդու իրավունքների խթանման ասպարեզներում»,- հայտարարել է Ջոն Արմսթրոնգը: «1991 թ.-ին Հայաստանի անկախության վերածնունդից ի վեր, ԱՄՆ-Հայաստան հարաբերությունները եղել են մեր արտաքին քաղաքականության գերակայություններից մեկը»,- իր խոսքում ասել է դեսպան Վարուժան Ներսիսյանը: «Հարյուր տարի առաջ այստեղ՝ Վաշինգտոնում գործում էր Հայաստանի դեսպանությունը:

Արմեն Գարոն, որի կիսանդրին դուք տեսաք այս շենք մտնելիս, Միացյալ Նահանգներում Հայաստանի առաջին դեսպանն էր, որը նույնպես, ինչպես ես, առերեսվել է պատերազմի և արտաքին ագրեսիայի իրականությանը: Հարյուր տարվա վաղեմության իրադարձությունները գրեթե նույնությամբ կրկնվեցին 2020 թ-ին»,- նշել է դեսպան Ներսիսյանը: Ըստ Ներսիսյանի՝ երկու ազգերը սերտորեն համագործակցել են բազում ոլորտներում՝ ներառյալ տարածաշրջանային և գլոբալ անվտանգությունը, ահաբեկչության դեմ պայքարը, զանգվածային ոչնչացման զենքի չտարածումն ու խաղաղապահ առաքելությունը: Նա ընդգծել է՝ ԱՄՆ-ի ու ՀՀ միջև առկա է առանձնահատուկ կապ՝ հիմնված ընդհանուր արժեքների, կայուն բարեկամության և հավատարիմ փոխվստահության վրա:

Մի մոռացեք կիսվել Ձեր ընկերների հետ
  •   
  •