Քաղաքացիական պայմանագիր կուսակցության ցուցակով Ազգային ժողովի պատգամավոր ընտրված Խաչատուր Սուքիասյանի եղբայրը՝ Ռոբերտ Սուքիասյանը, այս պահին ձերբակալված է։ Այդ մասին «Մեդիալաբին» ասաց Սուքիասյանի փաստաբան Գոռ Միքայելյանը։
Սուքիասյանը ձերբակալվել է Երևանի Ամիրյան փողոցում հուլիսի 18-ի երեկոյան միջադեպի ժամանակ հնչած կրակոցների փաստի առթիվ հարուցված քրեական գործի շրջանակներում։
«Մենք այս ձերբակալությունը համարում ենք ապօրնի և կարծում եմ՝ ամենայն հավանականությամբ, կբողոքարկենք ձերբակալման որոշումը: Ձերբակալումը հանցագործության կատարումը կանխելու կամ կատարելուց անմիջապես հետո փախուստը կանխելու նպատակ պետք է հետապնդի, բայց այս դեպքում ինքն ինքնակամ ներկայացել է, պատրաստակամություն է հայտնել պատմել ողջ եղելությունը»,-ասաց փաստաբան Միքայելյանը։
Ավելի վաղ Խաչատուր Սուքիասյանը հայտարարություն էր տարածել և նշել, որ Երևանի կենտրոնում տեղի ունեցած միջադեպն իր համար անընդունելի է և հավելել․
«Թե ինչ է տեղի ունեցել իրականում, ավելի ստույգ կհայտնեն ՀՀ իրավապահ համակարգի ներկայացուցիչները՝ օբյեկտիվ և բազմակողմանի քննություն իրականացնելուց հետո: Հայտարարում եմ, որ անկախ մարդու ով լինելուց, Հայաստանի հանրապետությունում բոլորն օրենքի առաջ հավասար են՝ անկախ սոցիալական և քաղաքական կարգավիճակից»։
