«Մուրացան» հիվանդանոցային համալիրում գտնվող 1 օրական աղջիկ երեխայի վիճակը բժիշկները գնահատում են կայուն ծանր: Նա միացված է արհեստական շնչառական սարքին:
Այս մասին ֆեսբուքյան իր էջում տեղեկացնում է Երևանի պետական համալսարանի աշխատակազմի ղեկավար Շուշան Դանիելյանը: Ըստ նրա՝ նորածինը ունի նաև ինֆեկցիաներ, ինչպես նաև շնչառական անբավարարություն: Նորածինը շարունակում է մնալ համալսարանական մասնագետների անմիջական հսկողության ներքո:
Երեխան «Մուրացան» հիվանդանոցային համալիր էր տեղափոխվել Երևանի Արցախի փողոցից: Ոստիկանության Էրեբունու բաժին էր ահազանգել Երևանի բնակիչ 28-ամյա Լուսիկ Գ․-ն և հայտնել, որ Արցախի փողոցի 15 շենքի բնակարաններից մեկի մուտքի մոտ նորածին երեխայի են թողել։ Ոստիկանության Էրեբունու բաժնի օպերատիվ խումբը պարզել է, որ նշված բնակարանը պատկանում է 72-ամյա Անահիտ Ա.-ին, ում մուտքի մոտ հայտնաբերվել է 1 օրական աղջիկ երեխա։
Ոստիկանության հասարակայնության հետ կապի և լրատվության վարչության զանգվածային լրատվամիջոցների հետ կապի, վերլուծության և լրատվության բաժնի պետ Զարզանդ Գաբրիելյանն էլ մեզ հետ զրույցում նշեց՝ ոստիկանությունում դեռևս նյութեր են նախապատրաստվում դեպքի հանգամանքներն ու փոքրիկի ծնողներին կամ հարազատներին գտնելու համար:
Ավելի վաղ ՀԺ-ի հետ զրույցում Դանիելյանը նշել էր, որ երեխայի վիճակը գնահատվում է բավարար:
