Իշխանավանք սրբավայրի անվան հետ է կապվում ներբանային գորտնուկ կոչվող հիվանդության բուժումը

Վարդենիկի Իշխանաց վանք սրբավայրը

Գեղարքունիքի մարզի Վարդենիկ գյուղում` համանուն գետի ափին է գտնվում Իշխանաց վանք սրբատեղին: Այս սրբավայրը թվագրվում է 11-13-րդ դարերով: Այն նախկինում եղել է խոշոր եկեղեցի, որը կոչվել է Սնչից Անապատ կամ Սուրբ Մինաս եկեղեցի:

Կոչվել է Իշխանաց վանք կամ Իշխանավանք , քանի որ եկեղեցու բակում է գտնվում իշխան Միրզայի գերեզմանը: Պահպանվել է հին եկեղեցու ավանդատներից մեկը: Գերեզմանի հարակից տարածքում է գտնվում պուրակը, որի մեջ կան 400-ից ավելի խաչքարեր՝ հիմնականում թվագրվող 11-13-րդ դարերով:

Սրբավայրի մասին առաջին տեղեկությունները ստանում ենք Ստեփանոս Օրբելյանի աշխատությունում: Մատենադարանում հայտնաբերված 1669 թվականով թվագրված մի փաստաթղթի համաձայն՝ այն կոչվել է Սուրբ Մինաս: Միջնադարում այն հարկատու է եղել Մաքենյաց վանքին:

Ներկայումս Վանքի պատերի շարվածքներում կան բազմաթիվ խաչքարեր, որոնք ժամանակին օգտագործվել են վանքի պատերը ամրացնելու և այն ներկայիս տեսքին բերելու համար, վերակառուցման դեպքում դրանք պիտի դուրս բերվեն և վանքի բակում կանգնեցվեն:

Տարիների ընթացքում սրբավայրը խոնարհվել է, բայց գյուղի Հազեյան գերդաստանը իր վրա է վերցրել տարածքի մշակութային ժառանգության պահպանությունը, իսկ Հայաստանի Հանրապետության անկախացումից հետո հանձնվել է Մայր աթոռի պատասխանատվությանը:

Այստեղ շատ են ուխտավորները Գավառից, Սևանից, Արարատի և Արմավիրի շրջաններից: Տիրոջ պայծառակերպության՝ Վարդավառի տոնը, այստեղ յուրահատուկ կերպով է նշվում:

Իշխանավանք սրբավայրի անվան հետ է կապվում ներբանային գորտնուկ կոչվող հիվանդության բուժումը: Վանքի տարածքում է գտնվում նրա վանահայրերից Տեր Մխիթարի գերեզմանը:

Տվյալ հիվանդությամբ ախտահարված հիվանդը, այցելելով Իշխանաց վանք, վերցնում էր Տեր Մխիթարի շիրմաքարի տակի հողը, որով շփում էր իր մարմնի ախտահարված հատվածը, որից հետո լիարժեք առողջանում է։

Նյութի աղբյուր՝ Հայաստանի Մատուռներ

Loading

Մի մոռացեք կիսվել Ձեր ընկերների հետ