Հունիսի 17-ին Երևան քաղաքի փողոցներից մեկում հոսանքահարված պատանիների դեպքով Ոստիկանությունը հարուցել է քրեական գործ և գործն ուղարկել Քննչական կոմիտե։ Քրեական գործը հարուցվել է Քրեական օրենսգրքի 279-րդ հոդվածի 3-րդ մասի հատկանիշներով, այսինքն անվտանգության պահանջներին
չհամապատասխանող ապրանքներ թողարկելը կամ իրացնելը, աշխատանքներ կատարելը կամ ծառայություններ մատուցելը, որոնք անզգուշությամբ առաջացրել են երկու և ավելի անձանց մահ։ Այս մասին Civic.am-ին տեղեկացրեց Ոստիականության ԶԼՄ-ների հետ կապի բաժնի պետ Զարզանդ Գաբրելյանը։
Քննչական կոմիտեի մամուլի խոսնակ Վարդան Թադևոսյանն էլ նշեց, որ դեպքը տեղի է ունեցել Նազարբեկյան Գ-1 թաղամասում։ Նրա խոսքով՝ այնտեղ տեղակայված ենթակայանը, որը հոսանքահարել է պատանիներին՝ մասնավոր է և ունի սեփականատեր․ «Գործը նախաքննության փուլում է, հիմա հավաքագրված նյութերի հիման վրա ճշտումներ են արվում»։
Նշենք, որ Քրեական օրենսգիրքը 279-րդ հոդվածի 3-րդ մասով սահմանում է պատիժ 4-10 տարի ազատազրկում՝ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը երեք տարի ժամկետով կամ առանց դրա:
Ըստ shamshyan.com-ի՝ հունիսի 22-ին, Երևանի Այրվածքաբանության ազգային կենտրոնում մահացել է Երևանի բնակիչ՝ 11-ամյա Հրանտ Խաչատրյանը։ Նա նշված կենտրոն էր տեղափոխվել հունիսի 17-ին «Էլեկտրական այրվածք՝ բոցով՝ 1,2,3,4 աստիճաններ» ախտորոշմամբ։
Նրա հետ նշված կենտրոն է տեղափոխվել նույն ախտորոշմամբ նաև Երևանի բնակիչ՝ 11-ամյա Նարեկ Քեշիշյանը, որը ևս օրեր անց մահացավ։
Հիվանդանոց մեկնած ոստիկանության Մաշտոցի բաժնի ծառայողները պարզել էին, որ երեխաները հիվանդանոց են տեղափոխվել իրենց փողոցի հոսանքի բաժանման կետում հոսանքահարվելու հետևանքով։