Առողջ նախաճաշի անհրաժեշտությունն ընդգծելու նպատակով Միավորված ազգերի կազմակերպության Պարենի համաշխարհային ծրագիրն (WFP) իրականացնում է «Այս օրը քոնն է» արշավը։
Ծրագրի պիլոտային փուլի համար ընտրվել են Կոտայքի մարզի 4 համայնքի 1-4-րդ դասարանցիներ, որոնք առաջիկա շաբաթների ընթացքում պետք է սննդային սովորությունների փոփոխություն գրանցեն։
«Արմենպրես»-ի թղթակցի հետ զրույցում ծրագրի համակարգող Վարդանուշ Պետրոսյանն ասաց, որ իրենց թիրախում երեխաներն ու ծնողներն են: Նպատակ ունեն փոխել վերջիններիս սննդային սովորությունները, որովհետև սնունդը խոսում է վարքագծի մասին:
ՄԱԿ-ի Պարենի համաշխարհային ծրագիրը մեծ հետազոտություն է իրականացրել Հայաստանում և հայտնաբերել հիմնական ոչ առողջ սովորությունները, որոնք են՝ շաքարի և աղի շատ օգտագործումը, ջուր չխմելը, սպիտակ ալյուրային սննդամթերք օգտագործելը, չնախաճաշելը, ձեռքերը չլվանալը և այլն:
«Արշավը չի կարող միանգամից հինգ թիրախ ունենալ և ուղղված կլինի միայն մեկին, որպեսզի ապահովվի արդյունավետությունը: Ընտրվել է առողջ նախաճաշերի ուղղությունը: Մեր նպատակը ՀՀ-ում առողջ նախաճաշ օգտագործողների թիվը բարձրացնելն է»,- շեշտեց ծրագրի համակարգողը:
Անդրադառնալով այն հարցին, թե ինչու է պիլոտային արշավը մեկնարկում Կոտայքի մարզում՝ Պետրոսյանը նշեց, որ նախապատրաստական աշխատանքները սկսվել են ծանր, դժվար ժամանակներում՝ պատերազմական, հետպատերազմական շրջանում, երբ ամենամոտ ու ապահով մարզը Կոտայքն էր:
Ծրագրի շրջանակում երեխաներին նախաճաշի համար օրագիր է հատկացվում, որտեղ նրանք ամեն օր ֆիքսում են իրենց արդյունքները:
«Աշխատում ենք ուսուցիչների, ծնողների հետ, սովորեցնում, թե ինչ կետերի վրա է անհրաժեշտ ուշադրություն դարձնել: Բացի այդ, երեխաներին խաղերի ձևով ենք ներկայացնում նախաճաշի դրական կողմերը, օգուտները և այն առողջ բաղադրիչները, որոնք պետք է նախաճաշի մաս լինեն»,- ասաց Վարդանուշ Պետրոսյանը:
Նրա խոսքով՝ երեխաներին ոգևորում են, որ նախաճաշեն, որովհետև դա էներգիա է տալիս ամբողջ օրվա համար, իսկ ծնողներին ոգևորում են երեխաների համար նախաճաշ պատրաստել և նախաճաշել նրանց հետ՝ օրինակ ծառայելով:
Նախատեսում են նաև ծնողների համար բացօթյա միջոցառումներ կազմակերպել՝ մայրերին առողջ ու հետաքրքիր բաղադրատոմսեր ներկայացնելու համար:
«Եթե ծրագիրը հաջողի, այն կանցկացվի ամբողջ Հայաստանում»,-եզրափակեց Վարդանուշ Պետրոսյանը:
Արշավի շրջանակում դպրոցում ինտերակտիվ խաղեր, ներկայացումներ կլինեն, որոնք կհանրահռչակեն առողջ նախաճաշի գաղափարը, ընտանիքներից կհավաքագրվեն առողջ նախաճաշի բաղադրատոմսեր, որոնք էլ արշավի ընթացքում կհրապարակվեն առանձին գրքով։
