ՀՀ նախագահ Արմեն Սարգսյանի ներկայությամբ, հունվարի 30-ին տեղի ունեցավ ՀՀ կառավարության անդամների երդման արարողությունը:
Առաջինն ամբիոնին մոտեցավ ՀՀ վարչապետ Նիկոլ Փաշինյանը՝ ընթերցելով երդման տեքստը.
«Հանուն համազգային նպատակների իրականացման և հայրենիքի հզորացման՝ երդվում եմ բարեխղճորեն կատարել ժողովրդի առջև ունեցած պարտավորություններս, պահպանել Հայաստանի Հանրապետության Սահմանադրությունը և օրենքները, նպաստել Հայաստանի Հանրապետության ինքնիշխանության և շահերի պահպանմանը, հավատարիմ մնալ կառավարության անդամի բարձր կոչմանը»:
Այնուհետ հերթով երդվեցին կառավարության մյուս անդամները:
Երդման արարողության ավարտին Նախագահ Արմեն Սարգսյանը շնորհավորեց վարչապետին և կառավարության անդամներին:
