Նոր տարվա տոներին ալերգիա չունեցող երեխային թույլատրվում է օրական երեք կոնֆետ ուտել, բայց գերադասելի է հիմնական կերակուրից հետո. անհրաժեշտ է չափավորել նաև միրգը և գազավորված ըմպելիքները, իսկ մայոնեզով և ապուխտով աղցաններ ընդհանրապես չպետք է մատուցվեն, РИА Новости-ի փոխանցմամբ, նշել են հարցված սննդաբանները:
Քաղցրավենիքի օրական թույլատրելի չափը, առաջին հերթին, կախված է երեխայի մոտ ալերգիայի առկայությունից, մարմնի քաշի ավելցուկից, բժշկի կողմից նշանակված սննդակարգից, ասել է սննդաբան Յուլիա Բաչուրինան:
«Ամեն ինչ անհատական է, բայց եթե ամեն ինչ կարգին է առողջության հետ, ապա լիարժեք կերակուրից հետո կերած երեք կոնֆետից վատ չի լինի», – նշել է նա:
Փորձագետը խորհուրդ է տվել նաև ուշադրություն դարձնել քաղցրավենիքի բաղադրությանը: «Կա բնական ձեռքով սարքած քաղցրավենիք, որը բաղկացած է հիմնականում չոր մրգերից, և կա քաղցրավենիք, որը բաղկացած է տրանս ճարպերից. նման քաղցրավենիք տալը, ընդհանուր առմամբ, անցանկալի է, բայց որակյալ, լավ, քաղցրավենիքով ինչո՞ւ երես չտալ», -ասել է սննդաբանը:
Ըստ նրա՝ գլխավորն այն է, որ երեխան կոնֆետն ուտի ոչ թե լիարժեք կերակուրի փոխարեն, այլ՝ դրանից հետո: Բացի այդ, ըստ մասնագետների, երեխաների տոնական ճաշացանկը չպետք է պարունակի ապուխտ, կծու կերակուրներ, տապակած սնունդ՝ շատ հավելանյութերով և համեմունքներով, շաքարավազով և տրանս ճարպերով: Ամանորին երեխային կարելի է առաջարկել ցածր յուղայնությամբ աղցաններ՝ առանց մայոնեզի:
Բացի այդ, ավելի լավ է զգույշ լինել ավանդական մանդարինի և այլ մրգերի նկատմամբ, զգուշացնում է ալերգոլոգ-իմունոլոգ, սննդաբան Լարիսա Դավլետովան:
«Մանդարինը և բոլոր ցիտրուսային մրգերը, հատապտուղները պետք է սահմանափակվեն. յուրաքանչյուր երեխա պետք է ունենա անհատական չափաբաժին, քանի որ դրանք մեծ քանակությամբ ուտելը կարող է երեխայի մոտ ալերգիկ ռեակցիաներ առաջացնել` մաշկի չորություն, քոր, կարմրածություն», – ասել է նա:
Սննդաբանները նաև խորհուրդ են տալիս սահմանափակել քաղցր և գազավորված ըմպելիքների հասանելիությունը:
