Թուրքական լրատվամիջոցները տեղեկությունների են տիրապետում, որոնց համաձայն՝ Եվրամիությունը ևս մեկ պատժամիջոց է պատրաստում կիրառել Թուրքիայի դեմ։ «Յենի Շաֆաք» լրատվական կայքը հայտնում է՝ նոր պատժամիջոցը ևս կապվում է Միջերկրական ծովի արևելյան ավազանում Թուրքիայի կողմից իրականացվող հորատման աշխատանքների հետ։
Այս որոշումները հստակ ցույց են տալիս, որ Եվրամիությունն անօրինական է համարում Թուրքիայի կողմից Հունաստանին և Կիպրոսին պատկանող տարածաշրջաններում իրականացվող գործողությունները:
Եվրամիությունը Թուրքիայի նավթային ընկերության խորհրդի անդամ և փոխնախագահ Մեհմեթ Ֆերրուհ Ակալընի և Թուրքիայի նավթային ընկերության Որոնման բաժնի փոխտնօրեն Ալի Ջոշկուն Նամօղլուի նկատմամբ պատժամիջոցը երկարաձգել է ևս 1 տարով Միջերկրական ծովի արևելյան ավազանում Թուրքիայի կողմից իրականացվող հորատման աշխատանքների պատճառով։
Այս մասին հայտնել է Եվրոպական խորհուրդը՝ նշելով, որ պատժամիջոցը կկիրառվի մինչ 2021 թվականի նոյեմբերի 12-ը։ Երկու անձանց արգելված են այցերը Եվրամիության երկրներ, իսկ նրանց ակտիվները սառեցվել են։ Բացի այդ, ԵՄ ֆիզիկական եւ իրավաբանական անձանց արգելվում է միջոցներ տրամադրել նրանց, ովքեր ընդգրկված են ցուցակում:
Եվրամիությունը 2019 թվականի հուլիսին պատժամիջոցներ է սահմանել Թուրքիայի նկատմամբ՝ Կիպրոսի բացառիկ տնտեսական գոտում հորատման պատճառով։ Բացի այդ, ԵՄ-ն նաեւ ֆինանսական սահմանափակիչ միջոցներ է մտցրել Անկարայի նկատմամբ՝ կրճատելով Թուրքիային 2020թ-ին հատկացվող օգնության ծավալը (ԵՄ-ին անդամակցելու բանակցային գործընթացի ժամանակ տրամադրվող սուբսիդիաները), ինչպես նաեւ առաջարկել է Եվրոպական ներդրումային բանկին վերանայել իր վարկային գործունեությունն այդ երկրում, մասնավորապես, սուվերեն ապահովման վարկավորման հարցում:
