Այսօր Հայկական միասնական տեղեկատվական կենտրոնում կայացած ասուլիսի ժամանակ ՀՀ ՊՆ ներկայացուցիչ Արծրուն Հովհաննիսյանին հարցրել են՝ ինչ պատասխան է տրվելու ՊԲ-ի կողմից Ստեփանակերտի ծննդատան ռմբակոծությանը, որին նա պատասխանել է,
«Մենք խաղաղ բնակիչներից մեր անհաջողությունների վրեժը չենք լուծելու, ինչպես դա իրականացնում է Ադրբեջանի ԶՈւ և ռազմաքաղաքական ղեկավարությունը:
Մենք մեր կռիվը վարելու ենք մեր տուն մտած թշնամու հետ՝ լինի դա Ադրբեջանի, թե՛ Թուրքիայի ԶՈւ ներկայացուցիչ կամ մեկ այլ պետության, թե՛ ահաբեկիչ կամ հրոսակ: Մենք ասել ենք՝ բարի գալուստ դժոխք»,- ասել է Հովհաննիսյանը՝ հավելելով, որ կռիվը երկար է, կայծակնային չէ, հայկական կողմը րոպեների կամ ժամերի ընթացքում չի հաղթելու, բայց հաղթելու է:
Ավելի վաղ ՊԲ-ն հայտարարություն էր տարածել, որտեղ ասվում էր.
ՊԲ-ն բազմիցս է ընդգծել իր հանձնառությունը կրակի դադարեցման վերաբերյալ ձեռք բերված պայմանավորվածություններին: Սակայն այդ պայմանավորվածությունների մասին ադրբեջանական կողմի պատկերացումները կարծես թե ամբողջույամբ այլ են. իրենք այդ պայմանավորվածությունները կարծես թե մեկնաբանում են՝ որպես Արցախի խաղաղ բնակչությանը և ենթակառուցվածքները թիրախավորելու, արցախահայությանը բնաջնջելու թույլտվություն: Դա այդպես չի կարող լինել: Արցախի ՊԲ-ն ձեռնարկում է բոլոր անհրաժեշտ քայլերը՝ Արցախի ժողովրդին ուղղված ցանկացած վտանգ չեզոքացնելու ուղղությամբ:
