ՀՀ անվտանգության խորհրդի քարտուղար Արմեն Գրիգորյանի ու ԱԱԾ նախկին տնօրեն Արգիշտի Քյարամյանի մասին տարածվող լուրերը չեն համապատասխանում իրականությանը։ Տեղեկությունը Sputnik Արմենիային հայտնեց ԱԱԾ մամուլի պատասխանատու Արթուր Գրիգորյանը։
«Դա կեղծ էջ է, և այն ամենը, ինչ այդ կայքում գրված է, չի համապատասխանում իրականությանը»,– ասաց Գրիգորյանը` մեկնաբանելով lurer.live անհասկանալի էջի տարածած կեղծ տեղեկությունները։
ԱԱԾ–ն հորդորում է զերծ մնալ խուճապ պարունակող հրապարակումներից
Գրիգորյանի խոսքով` համապատասխան ստորաբաժանումները զբաղվում են այդ էջով` պարզելու դրա ձևավորման ու ֆինանսավորման աղբյուրները։
Նշենք, որ այս կայքն այսօր հայտնել էր, որ Ազգային անվտանգության խորհրդի քարտուղար Արմեն Գրիգորյանը, իբր հայկական բանակի պլանների ու տեղաշարժի մասին գաղտնի տվյալներ է փոխանցել Ադրբեջանին։
Նույն կեղծ աղբյուրը նաև գրում է, իբր լրտեսության մեջ է կասկածվում նաև ԱԱԾ նախկին տնօրեն Արգիշտի Քյարամյանը։ Նա, իբր գաղտնի օպերացիաների մասին տեղեկություններ է հաղորդել հակառակորդին, ինչի համար երեկվանից ԱԱԾ մեկուսարանում է։