Ազգային ժողովի փոխնախագահ («Իմ քայլ») Ալեն Սիմոնյանն «Ազատության» հետ զրույցում ասում է` հայկական կողմի առջև կա երկու ընտրություն՝ «լավրովյան պլան» կամ պատերազմով պարտադրել խաղաղություն:
Ներկայացնում ենք հատվածներ հարցազրույցից.
«Ազատություն» — Որքան էլ որ գուցե տեղին չլինի, ներքաղաքական հարցը դուք որոշեք, բայց քանի որ եղել է արձագանք, ես ասեմ, նախկին իշխանության` Հանրապետականի կողմից, հնչեցնեմ, որ երբ վարչապետն ասում է` ինքը ժառանգել է «լավրովյան տարբերակը», կամ ինչպես ձևակերպեց, տարածքներ խաղաղության դիմաց լուծումը, Շարմազանովն ասում է` Փաշինյանի 2 տարվա գործունեությունն է հանգեցրել այս ամենին` պատերազմին:
Ալեն Սիմոնյան — Փաշինյանի 2 տարվա գործունեությունը հանգեցրել է նրան, որ մենք 20 օր է` կարողանում ենք դիմակայել ավելի մեծ ուժերի, քան երբևէ եղել են տարածաշրջանում, հանգեցրել է նրան, որ մենք բացի 80-ականների զենքերից, այսօր ունենք զենքեր, որոնք մեզ թույլ են տալիս դիմակայել, երկուսուկես ընդամենը տարվա ընթացքում: Եվ ես ցավով պետք է արձանագրեմ, որ վախենում եմ այն մտքից, որ Աստված մի արասցե, հեղափոխություն չլիներ, հիմա մեր թշնամին լավագույն դեպքում Ստեփանակերտում էր:
«Ազատություն» — Պարոն Սիմոնյան, երբ ասում եք, որ հիմա որոշվում է ամեն ինչ ճակատում, որքանո՞վ է Հայաստանի ներուժը դրան բավարարում այսօր:
Ալեն Սիմոնյան — Մենք այլընտրանք չունենք, չկա որևիցե բան, որ Հայաստանը, Արցախը կարող է անել և ինչ-որ բանի պատճառով չի անում, և չկա այլընտրանք: Ասել եմ` այլընտրանքը որն է` կա՛մ մենք հանձնում ենք այդ ամեն ինչը, ասում ենք` հեսա, վերցրեք, ու վստահ չենք լինում, որ դրանով ամեն ինչ ավարտվում է, կա՛մ մենք մարտի դաշտում ապացուցում ենք, որ հարցը ռազմական լուծում չունի, և տոնում ենք մեր հաղթանակը: Ես ցավով եմ սա ասում: Ես հասկանում եմ ամբողջ պատասխանատվությունը, այսօր իրավիճակը դա է:
