Արցախի նախագահի մամուլի խոսնակ Վահրամ Պողոսյանի կարծիքով` Թուրքիան Ադրբեջանի միջոցով փորձում է տարածաշրջանը վերածել ահաբեկչական նոր օջախի: Այս մասին Պողոսյանն ասաց հոկտեմբերի 12-ին «Ազատություն ռադիոկայան»-ի ֆեյսբուքյան ասուլիսի ընթացքում:
«Մենք բոլորս կողմ ենք, որպեսզի Ադրբեջանն իսկապես միջազգային հանրության կողմից ստանա արժանի պատիժ, որովհետև այսօր արդեն ոչ միայն Հայաստանը, ոչ միայն Արցախը, այլ նաև միջազգային հանրությունը, տարբեր ուժային կենտրոններ, Ռուսաստանի Դաշնությունը, Ֆրանսիան և շատ այլ միջազգային կազմակերպություններ հայտարարել են, որ այս պատերազմում ներգրավված են ահաբեկիչներ և Թուրքիան Ադրբեջանի միջոցով փորձում է տարածաշրջանը վերածել ահաբեկչական նոր օջախի»,- ասաց Պողոսյանը:
Վահրամ Պողոսյանը նշեց, որ սա արդեն բավական լուրջ մեղադրանք է ուղղված Ադրբեջանին, քանի որ աշխարհը պայքարում է ահաբեկչության դեմ, և Արցախի նախագահն էլ բազմիցս հայտարարել է այս ընթացքում, որ Արցախը ներգրավված է հակաահաբեկչական պայքարի մեջ:
«Միջազգային հանրությունը պարտավոր է շատ գործնական քայլեր կիրառել: Փաստարկները շատ տարբեր են, այսօր մի մասը հրապարակման ենթակա են, մի մասը պարզապես ներկայացվում են համապատասխան կառույցներին: Ադրբեջանի զոհերի մեջ կան բավական մեծ թվով դիակներ, որոնք արտաքինով նման են այն մարդկանց, որոնք Սիրիայում մասնակցել են տարբեր ահաբեկչական գործողությունների: Այս մասին կան տեսանյութեր, որոնք կհրապարակվեն, բայց այժմ ներկայացվում են տարբեր կառույցների»,- նշեց Վահրամ Պողոսյանը:
Արցախի հետ շփման գծի ողջ երկայնքով սեպտեմբերի 27-ի վաղ առավոտյան Ադրբեջանն ակտիվ ռազմական գործողություններ է սկսել: Հրետակոծվում և հրթիռակոծվում են նաև խաղաղ բնակավայրերը, այդ թվում՝ մայրաքաղաք Ստեփանակերտը և Շուշին: Ադրբեջանի ԶՈՒ-ն թիրախավորել է նաև ՀՀ զինվորական և քաղաքացիական ենթակառուցվածքները: Շփման գծում ընթացող համառ մարտերում երկու կողմն ունեն մարդկային ուժի և սպառազինության կորուստներ. ադրբեջանական կորուստները մի քանի անգամ գերազանցում են հայկական կողմինը: Հայտնաբերվել են Թուրքիայի ներգրավվածության, Սիրիայից վարձկանների տեղափոխման և Արցախի դեմ օգտագործման փաստեր:
Հայաստանի, Ռուսաստանի և Ադրբեջանի ԱԳ նախարարները հայտարարել են, որ հոկտեմբերի 10-ի ժամը 12:00-ից սկսած հաստատվում է մարդասիրական նպատակով կրակի դադարեցման մասին՝ ռազմագերիների և այլ պահպանման տակ գտնվող անձանց ու զոհվածների մարմինների փոխանակման նպատակով՝ Կարմիր խաչի միջազգային կոմիտեի (ԿԽՄԿ) միջնորդությամբ և չափորոշիչներին համապատասխան: «Հրադադարի ռեժիմի կոնկրետ պարամետրերը կհամաձայնեցվեն լրացուցիչ։ Ադրբեջանի Հանրապետությունը և Հայաստանի Հանրապետությունը ԵԱՀԿ Մինսկի խմբի համանախագահների միջնորդությամբ կարգավորման հիմնարար սկզբունքների հիման վրա ձեռնամուխ են լինում բովանդակային բանակցությունների՝ խաղաղ կարգավորմանը շուտափույթ հասնելու նպատակով: Կողմերը հաստատում են բանակցային գործընթացի ձևաչափի անփոփոխելիությունը»,-նշվել է հայտարարության մեջ։
Հոկտեմբերի 11-ին «Արմենպրես»-ի հետ զրույցում Կարմիր Խաչի միջազգային կոմիտեի հայաստանյան գրասենյակի հաղորդակցման ծրագրերի ղեկավար Զառա Ամատունին հայտնել է, որ Կարմիր խաչի միջազգային կոմիտեն չի սկսելու ներգրավվել որևէ մարդասիրական գործողության մեջ, մինչև Արցախի և Ադրբեջանի շփման գծում հումանիտար հրադադարն ամբողջությամբ չպահպանվի:
Հոկտեմբերի 11-ի երեկոյան, խախտելով հումանիտար հրադադարի պայմանավորվածությունը, ադրբեջանական զինված ուժերը հարավային ուղղությամբ ձեռնարկել են գրոհներ՝ կիրառելով զրահատեխնիկա և հրթիռահրետանային միջոցներ։
