Ռուսական «ԻնոՊրեսա» կայքը հայտնում է, որ գերմանական Der Spiegel պարբերականն ապացույցներ ունի այն մասին, որ Թուրքիայի նախագահ Էրդողանը սիրիացի վարձկաններին նպատակաուղղված ուղարկում է ԼՂ հակամարտության գոտի:
Գերմանական պարբերականի հետ հեռախոսազրույցում 24-ամյա սիրիացի Իբրահիմը հայտնել է, որ գտնվում է ապաստարանում՝ Լեռնային Ղարաբաղում առաջնագծի հարևանությամբ: «Նրա խոսքով՝ ապաստարանի վրայով թռչում են հայկական կործանիչները: Մեր ուղղությամբ հարվածներ են հասցվում: Մենք այնքան շատ մարդ ենք կորցրել, որ արդեն չեմ կարողանում հաշվել նրանց: Ես միայն հույս ունեմ, որ դուրս կգամ այստեղից»,- ասել է նա:
«Իբրահիմը, որը հետապնդումնեից խուսափելու համար չի ցանկացել հրապարակել իր ամբողջական անունը, նշել է, որ մինչև վերջերս մարտնչել էր Բաշար ալ-Ասադի դեմ Սիրիայի ազատ բանակի «Սուլթան Մուրադ» գնդի կազմում, սակայն այժմ ծառայում է Թուրքիայի նախագահ Ռեջեփ Թայիփ Էրդողանին, որը Սիրիայի ազատ բանակի միակ դաշնակիցն է ներկա պահին»,- ասվում է Der Spiegel-ի հոդվածում:
Պարբերականի հետ զրույցում Իբրահիմի ընկերներից ոմանք հրաժարվել են մասնակցել Լեռնային Ղարաբաղում ընթացող պատերազմին, սակայն ինքը համաձայնել է, քանի որ պիտի կերակրի ընտանիքին: Նրա կինն ու երեք երեխաները բնակվում են թուրք-սիրիական սահմանին գտնվող ճամբարում: Նրան 1000 դոլար ամսավճար են առաջարկել Կովկասում ռազմական գործողություններին մասնակցելու համար:
«Ես չգիտեմ, թե ինչ եմ այստեղ անում»,- ասել է Իբրահիմն ու ափսոսանք հայտնել, որ համաձանել է այդ աշխատանքին՝ չնայած վարձատրությանը:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 6-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 126 անօդաչու թռչող սարք, 379 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 3454 զոհ, ավելի քան 5270 վիրավոր։ Հայկական կողմից, նախնական տվյալներով, կա 251 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում վիրավորվել է 80 քաղաքացիական անձ, զոհվել՝ 19 մարդ, վնասվել՝ մոտ 2700 գույք ու ենթակառուցվածք։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։
