Մենք ռազմավարության մասով ամեն ինչ ճիշտ ենք արել, հանձնաժողովին էլ բարի երթ՝ հայտարարեց ՀՀ վարչապետ Նիկոլ Փաշինյանը՝ Կառավորության հետ հարցուպատասխանի ժամանակ անդրադառնալով կորոնավիրուսի հարցով խորհրդարանում քննիչ հանձնաժողովի ստեղծմանը:
Վարչապետը նշեց, որ ՀՀ կառավարությունը ինչպես պարտավորվել էր՝ 100 տոկոսով թափանցիկ է եղել և շարունակում է թափանցիկ մնալ կորոնավիրուսի հարցում:
«Ընդհանուր առմամբ ամենակարևոր ցուցիչը, որը պետք է նայենք, մեր օրական դրական դեպքերի տոկոսային հարաբերությունն է թեստերի հետ: Մենք այսօր մի տոկոսի ենք հասել արդեն բավական երկար ժամանակ, որ ամիս ու կես առաջ նույնիսկ չէինք կարող մտածել, թե կհասնենք այդ ցուցանիշին: Թեստավորվածների թվի հետ համեմատած՝ մեզ մոտ դրական դեպքերը հինգ-վեց տոկոս են: Սա նշանակում է, որ մենք շատ էֆեկտիվ հայտնաբերում ենք»,- շեշտեց Փաշինյանը:
Անդրադառնալով կորոնավիրուսի դեմ պայքարի վերաբերյալ հետևություններին՝ վարչապետը նշեց՝ միջազգային մամուլում բազմաթիվ հրապարակումներ կան, որ երկրների մեծ մասը կորոնավիրուսի իրական ցուցանիշներ չեն հրապարակում:
«Ես կարող եմ պաշտոնապես ասել, որ Հայաստանի Հանրապետությունը այդ երկրների թվին չի պատկանում: Այն ինչ-որ գիտի Կառավարությունը կորոնավիրուսի թվերի հետ կապված՝ գիտի հանրությունը»,- ասաց վարչապետը:
Նրա խոսքով՝ կորոնավիրուսի դեմ պայքարում ռազմավարական առումով Կառավարությունը ճիշտ է վարվել և ճիշտ է վարվում, թեև եղել են առանձին թերություններ: «Մի կողմից՝ Կառավարությանը մեղադրում են կորոնավիրուսի դեմ պայքարը ձախողելու մեջ, մյուս կողմից ասում են՝ թող մարդիկ դիմակ չկրեն, եկեք՝ ամեն ինչը բացեք, թող չտուգանեն, ոչ մի բան չանենք, կորոնավիրուս չկա,- ասաց վարչապետը և հավելեց,- մենք ռազմավարության առումով ամեն ինչ ճիշտ ենք արել, հանձնաժողովին էլ բարի երթ»:
